Senat «Mádenıet týraly» zań jobasy boıynsha kelisim komıssııasynyń quramyna depýtattardy saılady
ASTANA. Aqpannyń 4-i. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «Mádenıet týraly» QR zańyna ózgerister men tolyqtyrýlar engizý týraly» zań jobasy boıynsha kelispeýshilikterdi eńserý úshin kelisim komıssııasyn qurý týraly máseleni qarady.
Komıssııa quramyna Senat tarapynan músheler saılandy, dep habarlaıdy QazAqparat.
Esterińizge sala keteıik, atalǵan zań jobasy mádenıet týraly ulttyq zańnamany otandyq kınematografııany, murajaı jáne kitaphana isin qoldaý jáne damytý, sondaı-aq mádenı qundylyqtardy qalyptastyrý men saqtaý bóligin odan ári jetildirý kózdeledi. Zań jobasymen kınematografııa salasy boıynsha túsiniktemelik apparatqa birqatar jańa uǵymdar engizilgen. Buǵan qosa kınematografııa uǵymy da naqtylanyp, kıno sapasyn halyqaralyq standarttarǵa sáıkestendirý maqsatynda kınofılmderdi ındeksatsııalaý júıesi aıqyndalyp otyr. Jobada fılmderdi 6 sanat boıynsha bólý usynylady. Sonymen birge, prokattyq kýálikter berý sharalary da qarastyryldy. Budan basqa, ulttyq kıno uǵymyn aıqyndaýǵa qatysty 4 ólshem anyqtalǵan edi, Senat qabyrǵasyndaǵy talqylaý barysynda bul taǵy bir ólshemmen tolyqty. Budan basqa, Májilis maquldaǵan zań jobasyna senatorlar birqatar túzetýler engizgen bolatyn. Atap aıtqanda, joǵary palata depýtattary fılmge qatysty prokattyq kýálikti keri qaıtarmaı-aq berý tártibin eskertýdi usynyp otyr.
Kelisim komıssııasynyń quramyna Senat tarapynan depýtat Talǵatbek Abaıdildin, Ǵarıfolla Esim jáne Tólegen Muhamedjanovtar saılandy.
