Senat mádenıet máselesine qatysty zańnamaǵa mańyzdy túzetýler qabyldady
NUR-SULTAN. QazAqparat - QR Parlamenti Senatynyń jalpy otyrysynda Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» QR Zańy qabyldandy, dep habarlaıdy QazAqparat tilshisi.
«Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zań jobasynyń maqsaty qoldanystaǵy zańnamany jetildirý jáne mádenıet salasyn damytý úshin qolaıly jaǵdaılar jasaý bolyp tabylady. Jobamen qamtylǵan negizgi baǵyttar – kitaphana jáne baspa isi, mádenı-kópshilik is-sharalardy retteý máseleleri jáne shyǵarmashylyq odaqtardy qoldaýǵa qatysty túzetýler bolyp otyr», - dedi zań jobasy boıynsha baıandama jasaǵan QR Mádenıet jáne sport mınıstri Aqtoty Raıymqulova.
Onyń atap ótýinshe, joba «Ulttyq arhıv qory jáne arhıvter týraly», «Mádenıet týraly» jáne «Memlekettik múlik týraly» Qazaqstan Respýblıkasynyń zańdaryna túzetýler engizýdi kózdeıdi jáne túzetýlerdiń negizgi blogy mádenıet salasyna qatysty.
Qujatqa baılanysty qosymsha baıandama jasaǵan senator Aıgúl Qaparovanyń aıtýynsha, zań jobasynda elektrondy kitaphana, kontserttik qyzmet, kórkemdik keńester, qoǵamdyq mańyzy bar ádebıetterdi satyp alý, memlekettik kitaphanalar men mýzeılerdiń aqyly qyzmetteri týraly ózgerister kózdelgen. Úsh zańǵa «Mádenıet týraly», «Ulttyq arhıv qory jáne arhıvter týraly» jáne «Memlekettik múlik týraly» zańdaryna ózgerister engiziledi.
«Zań jobasy Qazaqstan ulttyq elektrondy kitaphanasynyń quqyqtyq negizderin qalyptastyrý tártibin kózdeıdi jáne elektrondy kitaphana qoryn keńeıtýge múmkindik berip, onyń obektilerin anyqtaıdy. Zań jobasynda «Qazaqstandaǵy kitaphanalardyń jıyntyq elektrondy katalogy» jáne «oıyn- saýyq mádenı buqaralyq is shara» týraly jańa uǵym engizildi. Qoǵamdyq mańyzy bar ádebıetterdi tańdaý jáne basyp shyǵarý, avtorlyq quqyq tártibi máseleleri rettelip, anyqtalyp otyr. Bul mańyzdy. Óıtkeni buǵan deıingi normada avtordan shyǵarmany memlekettik menshikke satyp alýda birqatar kelispeýshilikter oryn alyp, avtorlyq quqyq talaptaryn shekteıtin jaǵdaılar bolǵan. Endi memlekettiń avtorlardan shyǵarmashylyq ónimderdi belgili bir merzimge ǵana satyp alý normalary qarastyryldy«, - dedi ol.
Senatordyń sózine qaraǵanda, zań jobasy murajaı-kitaphana, teatr jáne tsırk óneri, mýzykalyq jáne kontserttik is-sharalar boıynsha aımaqtyq kórkemdik keńester qurýdy kózdeıdi. Bul kezeginde óńirlerdegi mádenı uıymdardyń qyzmetin úılestirip, onyń birqatar problemalaryn sheshýge atsalysady. Sonymen birge shyǵarmashylyq odaqtardy qarjylandyrýdy retteıtin jańa norma engizýdi kózdeıdi.
»Shyǵarmashylyq odaqtardy qoldaý elimizdegi áleýmettik saıasatty júzege asyrýdaǵy qatynastardyń jańa modelin qalyptastyrady. shyǵarmashylyq bastamalardy qoldaý qorlaryn qurýǵa múmkindik týady. Zań jobasyndaǵy kontserttik qyzmetti retteý normasy kontserttik qyzmetti júıeleý, oryndaýshylardyń deńgeıin jáne repertýardyń sapasyn arttyrý, sondaı-aq fonogrammalardy paıdalaný jónindegi máseleni retteý maqsatyn kózdeıdi. Alaıda oıyn-saýyq mádenı-buqaralyq is-sharalardy ótkizý kezinde birqatar mindettemeler engizilgenimen zańnamany buzǵany úshin ákimshilik jaýapkershilik qaralmaǵany týraly másele jumys toby barysynda biraz talqyǵa tústi. Osy oraıda Zań jobasyn ázirleýshi mınıstrlik quqyq qoldaný praktıkasynda atalǵan normany buzý boıynsha naqty faktiler júıeli túrde anyqtalǵan jaǵdaıda, aldaǵy ýaqytta «Ákimshilik quqyq buzýshylyq týraly» Kodekske ákimshilik jaýaptylyqty kózdeıtin túzetýler engizý jóninde bastama jasaý máselesin kóteretinin málimdep, komıtetke hat joldady. Zań jobasyn qabyldaý mádenıet, onyń ishinde kitaphana jáne baspa isi salasyndaǵy qatynastardy, oıyn-saýyq mádenı-buqaralyq is-sharalardy ótkizýdi uıymdastyrý máselelerin, memlekettik kitaphanalar men mýzeılerdiń aqyly qyzmetteri tártibin sondaı-aq shyǵarmashylyq odaqtarmen ózara is-qımyldy tıimdi retteýge múmkindik beredi«, - dedi Aıgúl Qaparova.
