Senat LGBT-ny nasıhattaýǵa tyıym salatyn qujatty talqylaýdy keıinge qaldyrdy
ASTANA. KAZINFORM — Búgin Senattyń jalpy otyrysynda pedofılııa men LGBT-ny nasıhattaýǵa tyıym salý normalary boıynsha zań qaralýy tıis edi. Alaıda bul qujat kún tárbinen alynyp tastaldy.
Atap aıtqanda, bul qujatta balalardy densaýlyǵy men damýyna zııan keltiretin aqparattan qorǵaý maqsatynda jarııa keńistikte, sondaı-aq mass-medıany, telekommýnıkatsııa jelilerin nemese onlaın-platformalardy paıdalana otyryp, pedofılııany jáne dástúrli emes seksýaldyq baǵdardy nasıhattaıtyn aqparatty ornalastyrýdy shekteý jónindegi normalar kózdelgen.
— Qazaqstan Respýblıkasynyń keıbir zańnamalyq aktilerine arhıv isi jáne quqyqqa qaıshy kontenttiń taralýyn shekteý máseleleri boıynsha ózgerister men tolyqtyrýlar engizý týraly» zańdy qaraý keıinge qaldyryldy. Óıtkeni onyń jekelegen normalaryn qosymsha pysyqtaý qajet boldy. Osy zańmen Qazaqstan Respýblıkasynyń Eńbek kodeksine, sondaı-aq Qazaqstan Respýblıkasynyń 12 zańyna ózgerister men tolyqtyrýlar engiziletinin atap ótý mańyzdy. Sondyqtan bul aýqymdy jumys pen qosymsha ýaqytty qajet etedi. Sonymen qatar, bul zań balalardyń quqyqtaryn qorǵaýǵa qatysty máselelerdi de retteıtinin jáne ol árqashan salmaqty, erekshe kózqarasty talap etetinin eskere otyryp, Palata depýtattary zańdy keıinirek qaraý týraly sheshim qabyldady, — delingen Senattyń baspasóz qyzmeti taratqan málimette.
Eske salsaq, bıyl 12 qarashada Parlament Májilisi balalardy densaýlyǵy men damýyna zııan keltiretin aqparattan qorǵaýǵa qatysty jańa normalardy qabyldaǵanyn jazǵan edik.