Senat Qyzylorda oblysynyń damýyna qatysty qujatty qabyldady

NUR-SULTAN. QazAqparat – Parlament Senatynyń jalpy otyrysynda «1994 jylǵy 10 jeltoqsandaǵy QR Úkimeti men RF Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Hattamaǵa 2017 jyly qarashada Chelıabi qalasynda eki el prezıdentteriniń qatysýymen ótken QR men RF arasyndaǵy óńirlik yntymaqtastyq jónindegi forým aıasynda qol qoıyldy.

QR Aýyl sharýashylyǵy mınıstriniń mindetin atqarýshy Aıdarbek Saparovtyń sózine qaraǵanda, hattamamen «Baıqońyr» keshenin jalǵa berý sharty №2 qosymshasyn jańa redaktsııada berý kózdelgen.

«Hattamamen oǵan jalpy alańy 11,6 myń gektar tórt jer ýchaskesi jalǵa alý bóliginen shyǵarylady. Onyń ishinde jalpy alańy 1 740 gektar eki ýchaske Qarmaqshy aýdany Tóretam kentin keńeıtý úshin, sondaı-aq 9 950 gektar eki ýchaske «Batys Eýropa-Batys Qytaı» halyqaralyq tranzıt dálizin, «Almaty-Máskeý» temirjolyn salý jáne «Beıneý-Shymkent» gaz qubyrynyń jelilik bóligi úshin alynyp otyr. Qujatty ratıfıkatsııalaý kórsetilgen ýchaskelerdi Reseıge jalǵa berilgen nysandardyń tiziminen shyǵarý barysyn aıaqtaý úshin qajet», - dedi ol.

Aıta keteıik, kórsetilgen jer telimderi Qyzylorda oblysynyń damýy úshin qajet. Osy sharalar óńirdiń áleýmettik jaǵdaıyna jáne ekonomıkasyna oń áserin tıgizedi. Bul jer telimderin jalǵa alýdan shyǵarý Reseı tarapynyń Qazaqstanǵa jyl saıynǵy jalǵa alý tólemi somasynyń qysqarýyna yqpal etpeıdi.