Senat Qylmystyq-protsessýaldyq kodeks jobasyna redaktsııalyq naqtylaý sıpatynda ózgerister engizdi
ASTANA. QazAqparat - Parlament Senaty Qylmystyq-protsessýaldyq kodeks jobasyn ekinshi oqylymda talqylap, qujatqa birqatar ózgerister engizgendikten ony Májiliske qaıtardy.
Eske sala keteıik, kodeks jobasy qylmystardy tergeý protsesin ońaılatý men jedeldetýge baǵyttalady. Bul rette qylmystyq protseske tartylǵan tulǵalardyń konstıtýtsııalyq quqyqtaryn qorǵaýdyń joǵary deńgeıin qamtamasyz etýge, sot tóreligin iske asyrýdyń tıimdiligin arttyrý maqsatynda qylmystyq sot isin júrgizýdi jetildirý kózdeledi. Atap aıtqanda, qylmystyq qýdalaýdy bastaý rásimin ońaılatý maqsatynda qylmystyq is qozǵaý jáne tergeýge deıingi tekseris júrgizý satysy alynyp tastalady. Tergeý jáne anyqtaý organdary azamattardyń konstıtýtsııalyq quqyqtaryn qozǵaıtyn protsestik áreketterdi derbes qabyldaý jónindegi ókilettikteri tarylady. Kerisinshe, qorǵaýshynyń sotqa deıingi is júrgizýden bastap qatysýynyń quqyqtyq negizderi keńeıtiledi.
Budan bólek, kodeks jobasymen qylmystyq protseske tergeý sýdıasy men protsess prokýrory sekildi fıgýralar engiziledi. Bul rette adamnyń konstıtýtsııalyq quqyqtary men bostandyqtaryn qozǵaıtyn barlyq tergeý áreketteri tergeý sýdıasy men protsess prokýrorynyń sanktsııasymen ǵana júrgiziletin bolady. Sonymen qatar, qylmystyq protseske kelisim ınstıtýty engiziletin bolady. Ol kináni moıyndaý týraly mámileni, yntymaqtastyq týraly kelisimdi júrgizedi. Aıta keterligi, mámile nysany onsha aýyr emes, aýyrlyǵy ortasha ne aýyr qylmystar boıynsha kúdikti nemese aıyptalýshy keltirilgen aıyptaýlarmen kelisken jaǵdaıda júzege assa, yntymaqtastyq kelisimi barlyq sanattaǵy qylmystar boıynsha qylmystardy ashýǵa jáne tergeýge kómektesken kezinde júrgiziledi. Budan bólek, kodeks jobasymen tergeý áreketterin, onyń ishinde adamdy nemese oryndy jasyryn aýdıo-beıne baqylaý, poshta jóneltilimderin jasyryn baqylaý júrgizý tártibi aıqyndalady.
Senat engizgen túzetýlerge kelsek, onyń basym bóligi redaktsııalyq naqtylaý sıpatynda. Mysaly, onda Memleket basshysynyń Prezıdenttiń kúzet qyzmeti men respýblıkalyq ulandy biriktirý jolymen QR Memlekettik kúzet qyzmeti etip qaıta uıymdastyrý týraly Jarlyǵyna sáıkes keltirý maqsatynda birqatar túzetýler engizilgen. Budan basqa, senatorlar kámeletke tolmaǵandardyń qatysýymen isterdi tek arnaıy mamandandyrylǵan sotta ǵana emes, olardyń turǵylyqty jerindegi sotta qaraý quqyǵyn iske asyrýǵa baǵyttalǵan tolyqtyrýlar engizildi. «Óıtkeni is júzinde sottyń kámelettik tolmaǵandardyń turǵylyqty jerinen shalǵaıda bolýyna baılanysty birqatar jaǵdaılarda adamdardyń sot otyrysyna kelýin qamtamasyz etý qıyndyqtar týdyrady», - delingen komıtettiń qorytyndysynda.
