Senat Qurylys kodeksin Májiliske qaıtardy
ASTANA. KAZINFORM — Senat Qurylys kodeksiniń jáne ilespe qujattyń jekelegen baptaryn maquldamaı jańa normalarmen tolyqtyrý arqyly Májiliske qaıtardy.
— Qurylys kodeksi — Qazaqstan Respýblıkasynda sáýlet, qala qurylysy jáne qurylys qyzmetin júzege asyrýǵa, adam mekendeıtin jáne tirshilik etetin tolyqqandy ortany qalyptastyrýǵa, eldi mekenderdi, qonysaralyq aýmaqtardy josparlaýǵa jáne damytýǵa, qurylys obektileriniń ómirlik tsıkliniń barlyq kezeńinde olardyń qaýipsizdigin qamtamasyz etýge baılanysty qoǵamdyq qatynastardy retteıdi. Senatta Kodeksti qaraý barysynda turaqty komıtetter tarapynan qoldanystaǵy zańnamaǵa sáıkestendirý bóliginde birqatar ózgeris pen tolyqtyrýlar engizdi, — dedi senator Súıindik Aldashev.
Onyń atap ótýinshe, sáýlet, qala qurylysy jáne qurylys isteri jónindegi ýákiletti organnyń quzyretinen respýblıkalyq mańyzy bar qalalardyń, astananyń jáne oblystardyń bas sáýletshilerin taǵaıyndaýdy kelisý jónindegi norma, Jer kodeksine sáıkestendirý maqsatynda aýdandar ákimdikteriniń quzyretinen jer ýchaskelerin berý quqyǵy alyp tastalady.
— Qurylys obektileri boıynsha jobalaý-smetalyq qujattamany ázirleý protsesin uıymdastyrý memlekettik ınvestıtsııalar esebinen qarjylandyrylatyn qurylys obektileri úshin mindetti bolyp tabylatyn «bir tereze» qaǵıdaty boıynsha jobalardy ázirleý men saraptaýdy uıymdastyrýǵa arnalǵan portalda júzege asyrylady. Sondaı-aq jeke turǵyn úı qurylysy aýmaǵynda áleýmettik, kólik jáne ınjenerlik ınfraqurylym obektilerin salý men paıdalanýdy qarjylandyrý jónindegi paıdalanýshynyń mindetin alyp tastaýdy kózdeıtin ózgeris engiziledi. Buǵan qosa, merdigerdiń (bas merdigerdiń) menshik ıesimen teń dárejede qurylys obektisin paıdalanýdan keıingi kezeńge (buzýǵa) qatysty sheshim qabyldaý quqyǵyn kózdeıtin norma alynyp tastalady, óıtkeni merdigerdiń qoldanystaǵy zańnamaǵa sáıkes mundaı sheshimder qabyldaýǵa zańdy negizderi joq, — dedi ol.
Sonymen birge senatordyń atap ótýinshe, sel, kóshkin jáne qar kóshkini qaýpi men táýekelderi kartalaryn qoldanýǵa baǵyttalǵan erejelerdiń 2030 jylǵa deıin qoldanylýyn toqtata turýdy kózdeıtin normany naqtylaý usynylady. Al ilespe zańnyń maqsaty — Qazaqstan Respýblıkasynyń zańnamalyq aktilerin Qurylys kodeksine sáıkestendirý, sondaı-aq memlekettik qyzmetter, sanıtarlyq-qorǵaý aımaqtary jáne turǵyn úı qurylysyna úlestik qatysý máselelerin retteý jáne taǵy basqalary.
— Zańdy qaraý barysynda da qoldanystaǵy zańnamaǵa sáıkestendirý bóliginde ózgerister men tolyqtyrýlar engizildi. Onyń ishinde adal emes qurylys salýshylar tizilimin iske asyrý tetigin jan-jaqty pysyqtaý maqsatynda atalǵan normalardyń qoldanylýyn 2026 jylǵy 1 shildege deıin toqtata turý usynylady. Joǵaryda baıandalǵandardy eskere otyryp, Ekonomıkalyq saıasat, ınnovatsııalyq damý jáne kásipkerlik komıteti Qazaqstan Respýblıkasynyń «Qazaqstan Respýblıkasy Parlamentiniń komıtetteri men komıssııalary týraly» Zańynyń 29-babynyń 7) tarmaqshasyn basshylyqqa ala otyryp, Qazaqstan Respýblıkasy Konstıtýtsııasynyń 61-babynyń 4-tarmaǵyna sáıkes Qazaqstan Respýblıkasy Senatynyń otyrysynyń qaraýyna Qazaqstan Respýblıkasynyń Qurylys kodeksin jáne «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyn engize otyryp, Qurylys kodeksiniń jáne Zańnyń jekelegen baptaryn maquldamaýdy jáne Kodeks pen Zańdy atalǵan baptardyń jańa redaktsııasyn usyný arqyly Májiliske qaıtarýdy usynady, — dedi senator.
Aıta ketelik keshe Prezıdent qurylys kompanııalarynyń jaýapkershiligin kúsheıtý qajet ekenin aıtqan.