Senat quqyqtyq statıstıka jáne arnaıy esepke alý týraly zańǵa ózgerister engizdi

Atalǵan qujat quqyqtyq statıstıka jáne arnaıy esepke alý salasyndaǵy ýákiletti organǵa jol-kólik oqıǵalaryn jáne sol oqıǵalarda zardap shekken adamdardy arnaıy esepke alýdy júrgizýge, sondaı-aq prokýrorlyq qadaǵalaýdyń barlyq aktilerin shyǵarý jónindegi ókilettikterdi beredi. Sonymen qatar, qujat Úkimet basshysynyń tapsyrmasyna oraı ázirlenip otyr. Atap aıtqanda, Premer-Mınıstr bundaı mindetti 2009 jylǵy Bas prokýratýra tarapynan jol-kólik oqıǵalary qaýipsizdigin qamtamasyz etýge qatysty jasalǵan tekserister nátıjesine oraı bergen bolatyn. Eske salsaq, 2009 jyly júrgizilgen tekserýler nátıjesinde vedomstvolyq statıstıkalyq kórsetkishterde aıtarlyqtaı alshaqtyq anyqtalǵan bolatyn. Máselen, ishki ister organdary men Densaýlyq saqtaý mınıstrligi men Statıstıka agenttikteriniń jol-kólik oqıǵasyna qatysty tirkegen málimetteri ártúrli. Atap aıtqanda, jol polıtsııasynyń málimetterine sáıkes 2009 jyly 12,5 myń jol-kólik oqıǵasy tirkelse, tekserister nátıjesinde bunyń 53 myńnan asqandyǵy anyqtaldy. Bundaǵy aıyrmashylyq 4 esege deıin artqan. Al jol apattary kezinde 2 myń 890 adam ólimi faktisi tirkelgen bolsa, naqtylaǵanda ondaı oqıǵalardan 3 myń 67 azamattyń ajal qushqany anyqtalyp otyr. Sol sekildi jol oqıǵalarynan 14 myń 700 adam jaraqat alǵan bolsa, densaýlyq saqtaý mekemelerinde 20 myńnan astam jaraqat alýshylar tirkelgen.

Osyǵan oraı, qabyldanǵan zań arqyly quqyqtyq statıstıka men arnaıy esepke alý salasyndaǵy ýákiletti organǵa jol-kólik oqıǵalary men olardan zardap shekken adamdardyń esebin júrgizý boıynsha ókilettikter berý kózdeledi.