Senat quqyq qorǵaý qyzmetkerlerin baspanamen qamtamasyz etý qujatyn Májiliske qaıtardy
ASTANA. KAZINFORM — Búgin Senattyń jalpy otyrysynda quqyq qorǵaý qyzmetin jetildirý, quqyq qorǵaý men azamattyq qorǵaý organdarynyń qyzmetkerlerin jáne áskerı qyzmetshilerdi turǵyn úımen qamtamasyz etý, sondaı-aq ishki ister organdarynyń qyzmeti salasynda artyq zańnamalyq reglamentteýdi bolǵyzbaýǵa qatysty zańy qaraldy.
Senat qujattyń jekelegen baptaryn jańa redaktsııada usynyp, ony Májiliske qaıtardy.
Zańnyń maqsaty - memlekettik organdar jumysynyń tıimdiligin arttyrý, zań men tártip qaǵıdasyn ilgerletý, ishki ister organdarynyń qyzmetindegi artyq zańnamalyq reglamentteýdi bolǵyzbaý, quqyq qorǵaý, arnaýly memlekettik, azamattyq qorǵaý organdary qyzmetkerleri men áskerı qyzmetshilerdi, turǵyn úımen qamtamasyz etý jáne áleýmettik qorǵaýdyń tetigin jetildirý úshin qoldanystaǵy zańdarǵa ózgerister men tolyqtyrýlar jasaý.
Zańǵa sáıkes, túzetýler 23 zańnamalyq aktige engiziledi, olardy tórt blokka toptastyrýǵa bolady.
- Birinshiden, Іshki ister mınıstrliginiń jumysyn ońtaılandyrý boıynsha: «Jergilikti polıtsııa qyzmeti» ınstıtýtynyń ornyna profılaktıka men qoǵamdyq qaýipsizdik basqarmalary qurylady. Bul ózgerister, jańa syn-qaterlerge jedel tosqaýyl qoıýǵa, zań men tártip qaǵıdasyn tıimdi iske asyrýdy qamtamasyz etýge múmkindik beredi. Іshki ister organdaryna qosymsha ókilettilik berý arqyly, qos azamattyqty azaıtýǵa jáne azamattyqtan shyǵýshylar úshin yńǵaıly tetikter jasalady.
«Daktıloskopııalyq jáne genomdyq tirkeý týraly» Zańǵa engizilgen ózgerister negizinde, Daktıloskopııalyq jáne genomdyq tirkeýdiń eriktilik qaǵıdasy jáne tulǵany verıfıkatsııalaýdyń zańnamalyq anyqtamasy engiziledi. Genomdyq jáne daktotirkeý aqparattar bazasyn qorǵaý mehanızmderi men daktotirkeýden bosatylatyn tulǵalar tizimi anyqtalady, - dedi senator Naýryzbaı Baıqadamov.
Ekinshiden, quqyq qorǵaý organdarynyń áleýmettik jaǵdaıyn jaqsartý normalary eskerilgen. Kúsh qurylymdarynyń qyzmetkerleri men áskerı qyzmetshilerdi, olardyń otbasy múshelerin áleýmettik qoldaý sharalary kúsheıtiledi. Endigi jerde, Turǵyn úı tólemderin alýshylardyń qataryna azamattyq qorǵaý organdarynyń, qarjy monıtorıngi agenttiginiń jáne prokýratýranyń qyzmetkerleri qosylady.
Munymen qosa osy zań aıasynda bet-álpetti tanýǵa kedergi keltirýge tyıym salý normalary engizildi.
- «Quqyq buzýshylyqtyń aldyn alý týraly» Zańǵa qyzmettik nemese eńbek mindetterin atqarý, medıtsınalyq maqsattarda, aýa raıy jaǵdaılaryn qospaǵanda, bet-álpetti tanýǵa kedergi keltiretin kıim-keshekti qoǵamdyq oryndarda kıip júrýge tyıym salý týraly norma engizildi. Bul shara bet-álpetti tanýdyń múmkindikterin jetildirý arqyly, qoǵamdyq oryndarda jasalatyn quqyq buzýshylyqtardyń, qylmystardyń aldyn alýdyń tıimdiligin arttyrady, - dedi depýtat.
Zańdy Parlament Senatynda qaraý barysynda senatorlar tıisti túzetýler engizdi. Osy oraıda bul túzetýler qujatty Májiliske qaıtarýǵa negiz boldy.
Zańdy qaraý barysynda týyndaǵan jáne ony jetildirýdi kózdeıtin myna ózgertýler eskerilgen:
- Zańnyń 1-baby 3-tarmaǵy 10) tarmaqshasynyń jıyrma úshinshi abzatsynda («Turǵyn úı qatynastary týraly» QR Zańynyń 101-4-baby 1-tarmaǵynyń úshinshi bóligi) quqyq qorǵaý, arnaýly memlekettik organdardyń, azamattyq qorǵaý organdarynyń qyzmetkerlerine jáne áskerı qyzmetshilerge turǵyn úı tólemderiniń mólsherin esepteý kezinde QR Úkimetiniń turǵynjaıdyń shekti aýdanyn aıqyndaý jónindegi quzyretin bekitý bóliginde ózgeris engizý usynyldy.
- Sonymen qatar, osy ózgeristerge sáıkestendirýge baılanysty, birneshe redaktsııalyq sıpattaǵy túzetýler («Turǵyn úı qatynastary týraly» QR Zańynyń 101-4-baby 1-tarmaǵynyń úshinshi bóligi) kózdeledi, - dedi Naýryzbaı Baıqadamov.
Eske salsaq, qoǵamdyq orynda bet-júzin tanýǵa kedergi keltiretin zattardy qoldanýǵa tyıym salynatynyn jazǵan edik.
Osy zańdy Parlament Májilisinde talqylaý kezinde «Jergilikti polıtsııa qyzmeti» degen uǵym joıylatyny málim boldy.