Senat KSRO-daǵy ónertabystar qupııasyna qatysty kelisimniń qoldanysyn toqtatty
ASTANA. KAZINFORM – Búgin Senattyń jalpy otyrysynda «1999 jylǵy 4 maýsymdaǵy Ónertabystardy quqyqtyq qorǵaý salasynda memleketaralyq qupııalardyń saqtalýyn ózara qamtamasyz etý týraly kelisimniń qoldanysyn toqtatý týraly hattamany ratıfıkatsııalaý týraly» Zańy maquldandy.
Osy kelisimge 1999 jylǵy 4 maýsymda Mınsk qalasynda Táýelsiz memleketter dostastyǵy úkimet basshylary qol qoıdy. Kelisimniń maqsaty - qupııa ónertabystar týraly málimetterdiń qupııalyǵyn qamtamasyz etý. Sondaı-aq, burynǵy KSRO-da jasalǵan qupııa ónertabystardy qupııasyzdandyrý tártibin aıqyndaýǵa baǵyttaldy.
«Kelisimniń TMD-ǵa qatysýshy memleketterde qoldanylý merziminiń barlyq kezeńinde KSRO-da jasalǵan qupııa ónertabystarǵa qorǵaý qujattaryn berýge birde-bir ótinish joldanbaǵan. Sondaı-aq, qupııa ónertabystardy qupııasyzdandyrýdyń birde-bir jaǵdaıy tirkelmegen. Sonymen qatar, ónertabystardy qorǵaý merzimi 20 jyldy quraıtynyn atap ótken jón. Qazirgi kezde KSRO-da jasalǵan barlyq ónertabystar boıynsha qorǵaý qujattarynyń áreket etý merzimi ótip ketti. Osyǵan baılanysty TMD-nyń Atqarýshy komıteti kelisimniń mańyzynyń joqtyǵyna baılanysty qoldanysyn toqtatý týraly másele kóterdi. Munymen qosa, TMD-nyń Syrtqy ister mınıstrleri keńesiniń 2018 jylǵy 27 qyrkúıektegi TMD aıasynda jasalǵan kópjaqty sharttardyń qoldanysyn toqtatý týraly qujattardyń jobalary týraly sheshiminiń, TMD-nyń Memleket basshylary keńesiniń jáne Úkimet basshylary keńesiniń sheshimderiniń negizinde TMD-nyń Atqarýshy komıteti Ónertabystardy quqyqtyq qorǵaý salasynda memleketaralyq qupııalardyń saqtalýyn ózara qamtamasyz etý týraly kelisimniń qoldanysyn toqtatý týraly hattama ázirledi», - dedi senator Sovetbek Medebaev.
Atalǵan hattamany ázirleýdiń maqsaty men negizgi mindeti - qupııa ónertabystarǵa qorǵaý qujattaryn berý týraly materıaldardyń bolmaýyna jáne qupııa ónertabystardy qupııasyzdandyrý jaǵdaılaryna baılanysty kelisimniń qoldanylýyn toqtatý.
«Qazir hattamany Ázerbaıjan Respýblıkasy, Belarýs Respýblıkasy, Qyrǵyz Respýblıkasy, Tájikstan Respýblıkasy, Reseı Federatsııasy ratıfıkatsııalady. Qazaqstan Respýblıkasy kelisimniń qoldanysyn toqtatý týraly hattamaǵa 2020 jylǵy 8 jeltoqsanda qol qoıdy. Senattyń turaqty komıtetterinen osy Zań boıynsha eskertýler men usynystar kelip túsken joq. «Qazaqstan Respýblıkasynyń halyqaralyq sharttary týraly» Qazaqstan Respýblıkasy Zańynyń 13 jáne 14-baptaryna sáıkes hattama ratıfıkatsııalaýǵa jatady. Atalǵan zańdy qabyldaý teris áleýmettik - ekonomıkalyq nemese quqyqtyq saldarǵa ákep soqpaıdy jáne memlekettik bıýdjetten qosymsha shyǵystardy talap etpeıdi», - dedi senator.
