Senat QR Prezıdenti N. Nazarbaevtyń Úndeýine oraı arnaıy qaýly qabyldady
ASTANA. Maýsymnyń 4-i. QazAqparat /Qanat Mámetqazyuly/ - Búgin QR Parlamenti Senatynyń kezekten tys otyrysy ótti. Kún tártibi boıynsha palata depýtattary QR Prezıdenti Nursultan Nazarbaevtyń halyqqa, Senat jáne Májilis depýtattaryna «Nur Otan» HDP saıası keńesiniń múshelerine arnalǵan Úndeýine oraı arnaıy qaýly qabyldady,
dep habarlaıdy QazAqparat.
Jıyn barysynda Palata Tóraǵasy Qasymjomart Toqaev Memleket basshysynyń Úndeýin jarııalaǵan bolatyn.
Esterińizge sala keteıik, Memleket basshysy osy Úndeýinde Parlamenttiń QR Tuńǵysh Prezıdenti - Elbasy týraly zańnamaǵa ózgerister men tolyqtyrýlar engizý týraly Zańyna qol qoıýdan bas tartqan edi. Jáne depýtattardan bul ustanymyn durys túsinýlerin ótingen.
Úndeýde Memleket basshysy: «Men qoǵamdyq pikirde berik qalyptasqan «El Basy» mártebesin zańdastyrý týraly Parlamenttiń sheshimin túsinistikpen qabyldaımyn.
Áleýmettik zertteýler búginde Qazaqstan halqynyń basym kópshiligi osy ıdeıany qoldaıtynyn kórsetip berdi. Sondyqtan, men eńbegimdi baǵalap, qoldaý bildirgenderi úshin qazaqstandyqtarǵa shynaıy alǵysymdy bildiremin.
Sonymen qatar, men El Basy mártebesin tek zańdarmen nemese ózge de quqyqtyq aktilermen belgileýge bolmaıdy dep esepteımin.
Memleket basshysyna qosymsha ókilettikter berý týraly mundaı tájirıbeler álemdik qoldanysta az emes.
Bizdiń taıaýdaǵy tarıhymyzda mundaı jaǵdaı buryn bolǵan, men onda reformalardy pármendi júrgizý úshin qosymsha ókilettikter suraǵan edim. Ol ýaqytta bul bizdiń elimizdiń postkeńestik kezeńdegi kúızelisten shyǵýynda sheshýshi faktor boldy.
Eger bolashaqta eldiń damýy men azamattardyń qaýipsizdigine, memlekettiń tutastyǵy men ulttyń múddesine qater tóndiretin almaǵaıyp zaman týsa, men qosymsha ókilettikter suraımyn jáne bultartpas tujyrym arqyly halyqtyń qoldaýyna tolyq ıe bolaryma kúmánim joq», degen edi.
Palatanyń otyrysy barysynda senatorlar Elbasy ustanymymen kelisip, daýys berdi.
