Senat Konstıtýtsııaǵa ózgeris engizý arqyly Prezıdenttiń referendým taǵaıyndaýy týraly máseleni talqylaýǵa kiristi
ASTANA. 6 qańtar. QazAqparat /Qanat Mámetqazyuly/ - Búgin QR Parlamenti Senatynyń 2011 jylǵy alǵashqy jalpy otyrysynda palata depýtattary «Qazaqstan Respýblıkasynyń Konstıtýtsııasyna ózgeris engizý máselesi boıynsha Qazaqstan Respýblıkasy Prezıdentiniń respýblıkalyq referendým taǵaıyndaý týraly» Qazaqstan Respýblıkasy Parlamenti depýtattarynyń usynysy jónindegi máseleni talqylaýǵa shyǵardy.
Esterińizge sala keteıik, bastamashylar QR Tuńǵysh Prezıdenti‑Elbasynyń ókilettigin uzartý týraly respýblıkalyq referendým ótkizý máselesin kóterip, ol Ortalyq saılaý komıssııasynda tirkeýden ótken soń, Parlament Májilisinde dál osy jaıt talqylanǵan bolatyn ári ol boıynsha Konstıtýtsııaǵa da ózgerister engizýge qatysty sóz bolǵan edi. Nátıjesinde, tómengi palata Memleket basshysynyń atyna referendým taǵaıyndaý týraly Úndeý joldap, «Siz respýblıkalyq referendýmda QR Tuńǵysh Prezıdenti - Elbasy N. Nazarbaevtyń Prezıdenttik ókilettiligin uzartý merzimin kózdeıtin QR Konstıtýtsııasyna ózgeris engizý týraly zańdy qabyldaısyz ba?», - degen máseleni shyǵarýdy ótingen. Depýtattardyń usynysymen qosa Memleket basshysynyń atyna QR Konstıtýtsııasyna ózgeris engizý týraly Zań jobasy birge joldandy. Toqtala ketetin jáıt, Konstıtýtsııa normalaryna, sondaı-aq «Respýblıkalyq referendým týraly» zań baptaryna sáıkes, Parlament palatalarynyń bólek otyrystarynda, áýeli Májilistiń, sonan soń Senattyń qaraýy arqyly respýblıkalyq referendým taǵaıyndaý týraly bastama kóteriledi. Ol boıynsha sheshim Parlament palatalarynyń tıisti qaýlylarymen bekitiledi.
Al sońǵy málimetterge súıensek, QR Tuńǵysh Prezıdentiniń ókilettiligin 2020 jylǵa deıin uzartý jónindegi respýblıkalyq referendým ótkizý týraly bastamany qoldaýǵa 2 mln. 590 qol jınalǵan.
