Senat komıtetinde zııatkerlik menshik salasyn quqyqtyq retteý máseleleri boıynsha zańnamalyq túzetýler qaraldy
ASTANA. QazAqparat - Búgin Qazaqstan Respýblıkasy Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń Úkimeti men Majarstan Úkimeti arasyndaǵy olardyń memleketteriniń aýmaǵynda zańsyz turatyn adamdardyń readmıssııasy týraly kelisimdi ratıfıkatsııalaý týraly» zań jobasy qaraldy.
Bul týraly palatanyń baspasóz qyzmetinen habarlady.
Kelisim eki memlekettiń aýmaǵyna kelý, onda bolý nemese turý sharttaryn oryndamaıtyn nemese oryndaýdy toqtatqan adamdardy anyqtaýdyń jáne qaýipsiz ári retimen qaıtarýdyń tıimdi rásimderin aıqyndaıdy, sondaı-aq osyndaı adamdardyń tranzıtine yqpalyn tıgizetin bolady.
Komıtet otyrysynda sondaı-aq «Qazaqstan Respýblıkasynyń keıbir zańnamalyq aktilerine zııatkerlik menshik salasyn quqyqtyq retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Zań jobasy zııatkerlik menshik salasyndaǵy zańnamany, onyń ishinde quqyqtyq olqylyqtardy, qaıshylyqtardy joıý, sondaı-aq ákimshilik kedergiler keltiretin normalardy bolǵyzbaý jolymen odan ári jetildirý maqsatynda ázirlendi.
Zań jobasy birqatar zańnamalyq aktilerge ózgerister men tolyqtyrýlar engizýdi kózdeıdi.
Qazaqstan men Ekonomıkalyq yntymaqtastyq jáne damý uıymy elderiniń patent zańnamasyn úılestirý maqsatynda zań jobasynyń Qazaqstandaǵy ónerkásiptik menshik obektilerine quqyqtardy qorǵaý quraldarynyń tizbesinen ınnovatsııalyq patent alyp tastalady, jekelegen obektilerdi jedeldetip patentteý engiziledi. Patentteýdiń qolaıly jaǵdaılary kózdelgen obektiler tizbesin ýákildi organ aıqyndaıdy.
Halyqaralyq tájirıbeni eskere otyryp, paıdaly model uǵymy keńeıtiledi. Zań jobasynyń erejelerine sáıkes jańa jáne ónerkásipte qoldanýǵa bolatyn tehnıkalyq sheshim quqyqtyq qorǵaý beriletin paıdaly model bolyp tanylady.
Zań jobasymen múliktik quqyqtardy ujymdyq negizde basqaratyn uıymdardyń jınalǵan syıaqyny bólý jáne tóleý úshin sharalar qoldaný mindeti kózdeledi.
Eki zań jobasy da Palatanyń qaraýyna jiberildi.
