Senat komıtetinde tórt zań jobasy qaraldy

Zań jobasy otandyq kınematografııany, murajaı jáne kitaphana isin qoldaýǵa jáne damytýǵa, sondaı-aq mádenı muralardy qalyptastyrýǵa jáne saqtaýǵa qatysty qoldanystaǵy quqyqty odan ári jetildirýdi kózdeıdi.

Zań jobasyn qaraý barysynda «Normatıvtik quqyqtyq aktiler týraly» zańǵa sáıkes Májilis maquldaǵan zań jobasynyń túsindirme bóligine, fılmderge prokat kýáligin berý tártibine, sondaı-aq  memlekettik tilge kásibı túrde aýdarylǵan fılmder prokatyna qatysty túzetýler engizý qajettigi aıtyldy.

Otyrysta «Bosqyndar týraly»zań jobasy da qaraldy. Bul zań jobasyn ázirleýge Qazaqstan Respýblıkasynyń halyqaralyq qoǵamdastyq aldynda bosqyndarǵa qatysty belgili bir mindettemeler alýy negiz bolyp tabylady. Olar - jer aýdaryp jibermeý prıntsıpi, bosqyn mártebesin berý rásimine qoljetimdilik, ýákiletti organnyń bosqyn mártebesin berý, uzartý, odan aıyrý týraly sheshimine shaǵymdaný jáne appelıatsııa berý múmkindigi.

Zań jobasynyń maqsaty Qazaqstan Respýblıkasy aýmaǵynda baspana izdegen adamnyń jáne bosqyndardyń quqyqtyq jaǵdaıyn aıqyndaý bolyp tabylady.

Komıtet «Qazaqstan Respýblıkasynyń keıbir zańnamalyq aktilerine bosqyndar máseleleri boıynsha ózgerister men tolyqtyrý engizý týraly» zań jobasyn da qarady. Bul zań jobasymen Qazaqstan  Respýblıkasynyń Ákimshilik quqyq buzýshylyq týraly kodeksine, «Halyqtyń kóshi-qony týraly» jáne «Memlekettik ataýly áleýmettik kómek týraly» zańdarǵa tıisti ózgerister engiziletin bolady.

Otyrysta «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly» zań jobasy da qaraldy.

Zań jobasy palatanyń qaraýyna usynyldy.