Senat komıtetinde TMD memleketterniń eńbekshi-mıgranttary men olardyń otbasy músheleriniń quqyqtyq mártebesi týraly zań jobasy qaraldy
ASTANA. Jeltoqsannyń 4-i. QazAqparat. Búgin Senattyń Áleýmettik-mádenı damý komıtetinde «Táýelsiz memleketter dostastyǵyna qatysýshy memleketterdiń eńbekshi-mıgranttary men olardyń otbasy músheleriniń quqyqtyq mártebesi týraly konventsııany ratıfıkatsııalaý týraly» zań jobasy qaraldy,
dep habarlady Senattyń baspasóz qyzmeti.
TMD-ǵa qatysýshy memleketterdiń eńbekshi-mıgranttary men olardyń otbasy músheleriniń quqyqtyq mártebesi týraly konventsııaǵa Kıshınevte 2008 jylǵy 14 qarashada qol qoıylǵan bolatyn.
Konventsııanyń maqsaty eńbekshi-mıgranttarǵa, olardyń otbasy múshelerine jáne qabyldaýshy memlekettiń azamattaryna qatysty teń qaraýdy qamtamasyz etý úshin jaǵdaı jasaý, sondaı-aq qatysýshy memleketter aýmaqtary boıynsha jumys kúshiniń júrip-turýyna qolaıly jaǵdaı jasaý bolyp tabylady.
Konventsııanyń kúshi qabyldaýshy Taraptyń aýmaǵynda zańdy negizde júrgen barlyq eńbekshi-mıgranttar men olardyń otbasy múshelerine qoldanylady. Árbir eńbekshi-mıgrant pen onyń otbasy múshesiniń Taraptardyń kez kelgeniniń aýmaǵynda onyń zańnamasyna jáne halyqaralyq sharttaryna sáıkes óziniń quqyqtyq sýbektiliginiń tanylýyna quqyǵy bar.
Konventsııaǵa qatysýshylar eńbekshi-mıgranttar men olardyń otbasy múshelerine quqyqtaryn iske asyrýǵa kepildik beredi, óz aýmaqtarynda eńbekshi-mıgranttardy tartý jáne olardyń eńbegin paıdalaný salasynda ózara is-qımyl jasaıdy, eńbekshi-mıgranttardyń qabyldaýshy tarapta bolý jáne aqyly eńbek qyzmetin júzege asyrý merzimi aıaqtalǵannan keıin qaıtarý máseleleri jóninde barlyq múmkin bolatyn sharalardy qabyldaıdy, medıtsınalyq saqtandyrý, kásiptik bilim berý máseleleri boıynsha yntymaqtasady.
Konventsııaǵa Qazaqstan Respýblıkasynyń eńbekshi-mıgranttardy áleýmettik qamsyzdandyrýǵa, sondaı-aq olarǵa jalpy jáne qosymsha kásiptik bilim berýge qatysty normalardy qoldanǵan kezde, Qazaqstan ulttyq zańnamany basshylyqqa alatyny týraly eskertpesimen qol qoıylǵan bolatyn.
Zań jobasy talqylanǵannan keıin palatanyń qaraýyna usynylatyn boldy.
