Senat komıtetinde terrorızmge qarsy is-qımyl jáne memlekettik materıaldyq rezerv máseleleri boıynsha zań jobalary qaraldy
ASTANA. Jeltoqsannyń 23-i. QazAqparat. Búgin Senattyń Halyqaralyq qatynastar, qorǵanys jáne qaýipsizdik komıtetinde «Qazaqstan Respýblıkasynyń keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy qaraldy,
dep habarlady Senattyń baspasóz qyzmeti.
Bul zań jobasy terrorıstik qylmys jasaǵan adamdarǵa eskirý merzimderin qoldanýǵa tyıym salýǵa, ekstremıstik nemese terrorıstik uıymnyń óz ataýyn ózgertý faktisin sottyń anyqtaý tetigin retteýge, buqaralyq aqparat quraldarynda terrorızmge qarsy operatsııalardyń tehnıkalyq tásilderi men taktıkasyn ashatyn málimetter men materıaldardy taratýdy shekteýge, terrorızmge qarsy operatsııanyń quqyqtyq rejımin retteýdi jetildirýge baǵyttalǵan.
Zań jobasymen «Terrorızmge qarsy kúres týraly» Qazaqstan Respýblıkasynyń Zańyna aıtarlyqtaı ózgerister men tolyqtyrýlar engizý usynylyp otyr. Atap aıtqanda, terrorızmge qarsy operatsııaǵa qatysatyn adamdardyń múmkindikterin negizsiz taryltýdy boldyrmaý maqsatynda azamattardyń turǵyn úı-jaılaryna terrorısterdiń izine túsken kezde ǵana kirýge bolady degen qaǵıdany alyp tastaý usynylady. Zańnamaǵa sáıkes keltirý úshin, eger kidirý adamdardyń ómiri men densaýlyǵyna naqty qaýip tóndirýi múmkin bolǵanda, osy is-qımyldyń sharty retinde jol beriletindigin bekitý usynylady.
Odan basqa, júrgizilgen is-qımyldardyń zańdylyǵyn tekserý úshin turǵyn úıge kirý faktileri týraly habarlamany jıyrma tórt saǵat ishinde prokýrorǵa jiberý týraly normamen tolyqtyrý usynylady.
Sonymen birge, TMD-ǵa qatysýshy elderdyń zańnamalaryn birizdendirý maqsatynda sharalardyń terrorıstik qaýip dárejesimen mólsherlestigi túrinde zańdy terrorızmge qarsy is-qımyldy júzege asyrýdyń jańa prıntsıpimen tolyqtyrý usynylady.
Komıtettiń keńeıtilgen otyrysynda «Qazaqstan Respýblıkasynyń keıbir zańnamalyq aktilerine memlekettik materıaldyq rezerv máseleleri boıynsha ózgerister men tolyqtyrýlar engizý týraly» zań jobasy da qaraldy.
Bul jobanyń negizgi maqsaty «Memlekettik materıaldyq rezerv týraly» jáne «Memlekettik qupııalar týraly» Qazaqstan Respýblıkasynyń zańdaryn memlekettik materıaldyq rezerv júıesin damytýdyń tujyrymdamalyq kózqarastaryna sáıkes keltirý, sondaı-aq quqyqtyq olqylyqtardyń ornyn toltyrý bolyp tabylady.
Zań jobasymen «Memlekettik qupııalar týraly» Zańǵa ózgeris engiziledi, onda áleýetti ónim berýshiler tobyn ulǵaıtý, taýar baǵasyna ońdy yqpal etý, materıaldyq qundylyqtardy ýaqtyly shyǵarý maqsatynda málimetterden qupııalandyrýǵa, ornalastyrýǵa jatatyn materıaldyq qundylyqtardy saqtaý pýnktterin alyp tastaý usynylady.
Ýákiletti organnyń memlekettik rezerv nomenklatýrasyn toltyrý maqsatynda jumyldyrý rezerviniń bronnan shyǵarylǵan materıaldyq qundylyqtarynyń ornyn aýystyrýǵa qatysty sheshimdi qabyldaý jónindegi jańalyq engizildi.
Naryqqa retteýshilik yqpal jasaý úshin memlekettik rezervten materıaldyq qundylyqtardy shyǵarý tártibi de aıqyndalǵan.
Komıtet otyrysynda qaralǵan eki zań jobasy da palatanyń qaraýyna jiberiletin boldy.
