Senat komıtetinde sot júıesin jetildirý jónindegi zań jobalary qaraldy
ASTANA. QazAqparat - Búgin Qazaqstan Respýblıkasy Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zań jobasy birinshi oqylymda qaraldy.
Qujat sýdıalardyń táýelsizdigin kúsheıtýge, sýdıa laýazymyna úmitkerlerdi konkýrstyq tańdaý rásimderin jetildirýge, sýdıa laýazymyna úmitkerlerdi tańdaýda jurtshylyqtyń rólin kúsheıtýge, jetekshi sýdıa laýazymdarynyń kadr rezerviniń róli men mánin arttyrýǵa baǵyttalǵan. Joǵarǵy jáne oblystyq sot organdarynyń qurylymyna jalpy otyrys tóralqasyn qosýdy kózdeıtin tolyqtyrý engiziledi. Jalpy otyrystarda qaraý úshin sottar qyzmetin jetildirý jónindegi usynystardy jalpy otyrystyń tóralqasy ázirleýdi qamtamasyz etetin bolady.
Jobada oblystyq sottardyń tóraǵalary men sot alqalary tóraǵalarynyń bos qyzmet oryndaryna úmitkerlerge talaptar bekitilgen.
Odan basqa, aýdandyq sottyń tóraǵasy, oblystyq sottyń jáne sot alqalarynyń tóraǵalary qyzmetine, Joǵarǵy Sottyń sýdıalary men sot alqalarynyń tóraǵalary bolatyn jetekshi sýdıa laýazymyna tańdaý kezinde kadr rezervinde turǵan adamǵa basymdyq beriledi.
Sondaı-aq komıtette «Qazaqstan Respýblıkasynyń keıbir zańnamalyq aktilerine sot tóreligin iske asyrýdy odan ári jeńildetý, tóreshildik rásimderdi azaıtý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy. Bul zań jobasy birqatar zańnamalyq aktilerge ózgerister men tolyqtyrýlar engizýdi kózdeıdi.
Tujyrymdamalyq turǵyda maquldanǵan zań jobalary Palataǵa birinshi oqylymda qaraýǵa jiberildi.
