Senat komıtetinde sot júıesin jetildirý máseleleri boıynsha zań jobasy qaraldy
ASTANA. Qyrkúıektiń 16-sy. QazAqparat - Búgin Senattyń Zańnama jáne quqyqtyq máseleler komıtetinde «Qazaqstan Respýblıkasynyń Qylmystyq, Qylmystyq is-júrgizý jáne Azamattyq is júrgizý kodeksterine sot júıesin jetildirý máseleleri boıynsha ózgerister men tolyqtyrýlar engizý týraly» zań jobasy qaraldy,
dep habarlaıdy QazAqparat.
Zań jobasy «Qazaqstan Respýblıkasyndaǵy sot júıesi jáne sýdıalar mártebesi týraly» Konstıtýtsııalyq zańǵa sáıkes Qazaqstandaǵy sot júıesin odan ári jańǵyrtýǵa baǵyttalǵan.
Zań jobasynyń tujyrymdamasy Qazaqstan Respýblıkasyndaǵy úsh býyndy sot júıesin ońtaılandyrýdy kózdeıdi. Jobada qylmystyq jáne azamattyq barlyq ister birinshi kezekte qaralýǵa jatatyn aýdandyq jáne olarǵa teńestirilgen sottar birinshi býyn bolyp tabylady.
Ekinshi býyn isterdi appelıatsııalyq jáne kassatsııalyq tártipte qaraıtyn oblystyq jáne solarǵa teńestirilgen sottar bolsa, úshinshi býyn isterdi tek qadaǵalaý tártibimen qaraıtyn Joǵarǵy Sot bolady.
Joba arqyly jańadan mamandandyrylǵan sottar erekshe aýyr qylmystar týraly qylmystyq ister qaralýǵa jatatyn birinshi satydaǵy sottar bolyp tabylatyn qylmystyq ister boıynsha mamandandyrylǵan aýdanaralyq sottar jáne birinshi satydaǵy mamandandyrylǵan áskerı sottar engizilgeli otyr.
Mamandandyrylǵan aýdanaralyq sottarda qaralýǵa jatatyn ister aýqymy da jasy kámeletke tolmaǵandar isi boıynsha keńeıetin boldy. Sondaı-aq jıyntyq uǵymymen ajyratylǵan qylmystardyń kóp márte bolýy, qaıtalama qylmystar men retsıdıvtik te retteledi.
Sot úderisindegi aıqyndyq pen ashyqtyqty qamtamasyz etý maqsatynda dybys jáne beıne jazbalar sekildi tehnıkalyq quraldardy qoldaný máseleleri de qarastyrylyp otyr.
Komıtet músheleri otyrysta «Qazaqstan Respýblıkasynyń keıbir zańnamalyq aktilerine memlekettiń jáne onyń menshigine ımmýnıteti, aralyq sottar jáne halyqaralyq kommertsııalyq tórelik qyzmetin jetildirý máseleleri boıynsha ózgerister men tolyqtyrýlar engizý týraly» da zań jobasyn qarady.
