Senat komıtetinde «shóptik mıksterdiń» satýyn tııatyn joba talqyǵa tústi
ASTANA. 15 naýryz. QazAqparat /Qanat Mámetqazyuly/ -Búgin QR Parlamenti Senaty Agrarlyq máseleler jónindegi komıtettiń keńeıtilgen otyrysy bolyp ótti.
Jıyn barysynda senatorlar «Esirtki, psıhotroptyq zattar, prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly» zań jobasyn talqylady.
Esterińizge sala keteıik, Májilistiń maquldaýynan ótken osy zań jobasyna depýtattar bastamashylyq jasaǵan bolatyn. Bul rette bastamashylar esirtkini paıdalanýdyń jasóspirimder arasynda keńinen taralýy qoǵamnyń úlken alańdaýshylyǵyn týdyryp otyrǵanyn alǵa tartyp, buǵan qoǵam men áleýmet óz yqpalyn kúsheıtýleri tıistigin aıtqan edi. Sonymen qatar, depýtattar buǵan deıin elimizde halyq densaýlyǵyna keri áser etetin «shóptik mıkster» erkin satylyp kelgenine de alańdaýshylyq bildiredi. «Bular esirtkimen áseri birdeı. Ótken jyldyń 20 qańtarynda elimizdiń Bas sanıtarynyń qaýlysy boıynsha «shóptik mıksterdi» satýǵa tyıym salyndy. Alaıda, tyıym salý sharasyn buzǵan azamattarǵa tıisti ákimshilik nemese qylmystyq jaýapkershilik qarastyrylmaǵan», - deıdi zań jobasyna bastamashy bolǵan depýtat Berik Bekjanov. Onyń aıtýynsha, zań jobasyn qabyldaý qosymsha qarjylyq-ekonomıkalyq shyǵyndarǵa soqtyrmaıdy.
Zań jobasy Parlament Senatynyń jalpy otyrysyna shyǵarylatyn boldy.
