Senat komıtetinde sáıkestendirý nómirleri týraly zań jobasy qaraldy
ASTANA. Maýsymnyń 14-i. QazAqparat - Búgin Senattyń Zańnama jáne quqyqtyq máseleler komıtetinde «Qazaqstan Respýblıkasynyń keıbir zańnamalyq aktilerine sáıkestendirý nómirleri máseleleri boıynsha ózgerister engizý týraly» zań jobasy qaraldy.
Zań jobasynyń negizgi maqsaty sáıkestendirý nómirlerin engizý merzimin keıinge qaldyrý bolyp tabylady.
Qoldanystaǵy «Sáıkestendirý nómirleriniń ulttyq reestri týraly» zańy boıynsha jeke jáne zańdy tulǵalar úshin sáıkestendirý nómirlerin paıdalanýǵa kóshý 2010 jylǵy 13 tamyzdan bastalýy qarastyrylady.
Memlekettik organdardyń aqparattyq jáne tólem júıeleriniń sáıkestendirý nómirlerin paıdalanýǵa ázir emestigin eskere otyryp, zań jobasy sáıkestendirý nómirlerin 2012 jylǵy 1 qańtardan bastap engizýdi usynady.
Zań jobasy «Salyq jáne bıýdjetke tólenetin basqa da mindetti tólemder týraly» (Salyq kodeksi) Qazaqstan Respýblıkasynyń kodeksin kúshine engizý týraly» zańyna, sondaı-aq qoldanystaǵy zańnamaǵa sáıkestendirý nómirleriniń ulttyq reestri, bankrottyq, zańdy tulǵalardy memlekettik tirkeýdi jáne fılıaldar men ókildikterdi eseptik tirkeýdi jeńildetý máseleleri boıynsha tıisti túzetýler engizedi.
Zań jobasy palatanyń qaraýyna jiberiletin boldy.
