Senat komıtetinde sanıtarııalyq sharalar jónindegi kelisim týraly zań jobasy talqylandy
ANA. Maýsymnyń 15-i. QazAqparat /Qanat Mámetqazyuly/ - Búgin QR Parlamenti Senaty Áleýmettik-mádenı damý komıtetiniń keńeıtilgen otyrysy ótti. Onda «Keden odaǵynyń sanıtarııalyq sharalar jónindegi kelisimin ratıfıkatsııalaý týraly» zań jobasy talqylandy,
dep habarlaıdy QazAqparat.
Zań jobasynyń maqsaty Keden odaǵynyń kedendik aýmaǵyn ınfektsııalyq jáne jappaı ınfektsııalyq emes aýrýlardyń (ýlanýlardyń) halyq arasynda taralýynan jáne sanıtarııalyq-epıdemıologııalyq talaptarǵa sáıkes kelmeıtin ónimniń (taýarlardyń) ákelinýinen qorǵaýdy, sonymen birge, zań jobasynda halyqtyń sanıtarııalyq-epıdemıologııalyq salaýattylyǵyn qamtamasyz etý sharalary qamtylady. Kelisim Keden odaǵynyń sanıtarııalyq talaptar men sharalardy qoldaný salasynda kelisilgen saıasat júrgizýge múmkindik beredi. Bul Keden odaǵynyń aýmaǵyn janýarlardyń juqpaly aýrýlary qozdyrǵyshtarynyń ákelinýinen jáne taralýynan qorǵaýdy ári ekonomıkalyq shyǵyndy azaıtýdy qamtamasyz etedi, sondaı-aq halyqaralyq saýdadaǵy kedergilerdi joıýǵa múmkindik beredi.
Zań jobasy palatanyń qaraýyna jiberiletin boldy.
