Senat komıtetinde órt qaýipsizdigi týraly zań jobasy qaraldy
ASTANA. Sáýirdiń 14-i. QazAqparat - Búgin Senattyń Agrarlyq máseleler jáne qorshaǵan ortany qorǵaý komıtetinde «Qazaqstan Respýblıkasynyń keıbir zańnamalyq aktilerine órt qaýipsizdigi máseleleri boıynsha ózgerister men tolyqtyrýlar engizý týraly» zań jobasy qaraldy,
dep habarlaıdy Senattyń baspasóz qyzmeti.
Bul zań jobasy halyqtyń, zańdy tulǵalar men jeke kásipkerler múlkiniń qorǵalý deńgeıin arttyrýdy, olardyń qaýipsizdigi jaı-kúıin baǵalaýdy táýelsiz sarapshy uıymdar salasyna engizýdi kózdeıdi. Sondaı-aq memlekettik órt baqylaý organdary júzege asyratyn tekserister sanyn qysqartý esebinen qorǵaý obektilerine ákimshilik júktemeni azaıtý jáne baqylaý qyzmetiniń nysandary men ádisterin jetildirý maqsatynda ázirlengen bolatyn.
Joba aıasynda elimizdiń Ákimshilik quqyq buzýshylyq týraly kodeksine tolyqtyrýlar engiziledi. Atap aıtqanda, sarapshy uıymdardyń órt qaýipsizdigi salasyndaǵy qaterlerge táýelsiz baǵalaý júrgizý nátıjeleri boıynsha jáne olardy ýákiletti organǵa ýaqytyly tabys etý jaýapkershiligi belgilenetin boldy. Jobada órtke qarsy erikti quralymdardy qurý jáne olardyń qyzmetin júzege asyrýdyń tártibi de qarastyrylady.
Zań jobasyn talqylaý barysynda komıtetterdiń eskertpeleri men usynystary eskerile otyryp Májilis maquldaǵan zań jobasyna ózgerister men tolyqtyrýlar engizý qajettigi týyndady. Onyń ishinde adamdar jappaı jınalatyn obekt uǵymy naqtylandy, jergilikti atqarýshy organdardyń órt qaýipsizdigi salasyndaǵy ókilettigi aıtarlyqtaı tolyqtyryldy. Órtke qarsy erikti quralymdardyń tizilimin júrgizý fýnktsııasyn ýákiletti organnyń aýmaqtyq bólimshesine berý kózdelip otyr.
Birqatar talqylaýlardan keıin zań jobasyn palata otyrysynda qaraý týraly qorytyndy jasaldy.
