Senat komıtetinde normatıvtik quqyqtyq aktilerdi qabyldaý quziretterine qatysty zań jobasy talqylandy
ASTANA. 4 naýryz. QazAqparat - Búgin Senattyń Ekonomıkalyq jáne óńirlik saıasat komıtetinde «Qazaqstan Respýblıkasynyń keıbir zańnamalyq aktilerine ýákiletti memlekettik organdar men Qazaqstan Respýblıkasy Úkimetiniń
tekseriletin sýbektilerge qoıylatyn talaptardy belgileıtin normatıvtik quqyqtyq aktilerdi qabyldaý quziretterin qaıta qaraý máseleleri boıynsha ózgerister men tolyqtyrýlar engizý týraly» zań jobasy talqylandy.
Zań jobasymen «Qazaqstan Respýblıkasynyń keıbir zańnamalyq aktilerine jeke kásipkerlik máseleleri boıynsha ózgerister men tolyqtyrýlar engizý týraly» zańmen qoldanystaǵy zańnamalyq aktiler sáıkestendiriletin bolady.
Atap aıtqanda, ol tekseriletin sýbektilerge qoıylatyn talaptardy belgileıtin normatıvtik quqyqtyq aktiler ıerarhııasyna, sondaı-aq kásipkerlikti qoldaıtyn memlekettik qarjy quraldaryn keńeıtýge qatysty bolyp otyr.
Zań jobasymen «Ákimshilik quqyq buzýshylyq týraly», «Halyq densaýlyǵy jáne densaýlyq saqtaý júıesi týraly», «Qazaqstan Respýblıkasyndaǵy Keden isi týraly», Jer, Sý, Orman, Ekologııalyq jáne Eńbek kodeksterine ózgerister engiziletin bolady. Túzetýler sonymen qatar «Qazaqstan Respýblıkasyndaǵy memlekettik jáne jergilikti ózin-ózi basqarý týraly», «Ákimshilik protsedýralar týraly», «Jeke kásipkerlik týraly», «Memlekettik baqylaý jáne qadaǵalaý týraly», «Oıyn bıznesi týraly» zańdarǵa da engiziledi.
Otyrysta «Qazaqstan Respýblıkasynyń keıbir zańnamalyq aktilerine ruqsat berý júıesin jetildirý máseleleri boıynsha ózgerister men tolyqtyrýlar engizý týraly» zań jobasy da qaraldy.
Eki zań jobasy da palata qaraýyna jiberildi.
