Senat komıtetinde «Neke (erli-zaıyptylyq) jáne otbasy týraly» kodeksiniń jobasy qaraldy
TANA. 7 qyrkúıek. QazAqparat - Búgin Parlament Senatynyń Áleýmettik-mádenı damý komıtetinde «Neke (erli-zaıyptylyq) jáne otbasy týraly» kodeksiniń jobasy qaraldy, dep habarlaıdy QR Parlamenti Senatynyń baspasóz qyzmeti.
Kodekstiń jobasy Qazaqstan Respýblıkasynda neke-otbasy qatynastaryn retteýge, olardyń júzege asyrylýynyń kepildikterin belgileýge, sondaı-aq otbasynyń quqyqtary men múddelerin qorǵaýdy qamtamasyz etýge baǵyttalǵan.
Kodeks jobasyn ázirleýdiń maqsaty normatıvtik quqyqtyq aktilerdiń qoldanystaǵy erejelerin kodıfıkatsııalaý jáne neke-otbasy qatynastary salasynda qosymsha normalar engizý bolyp tabylady.
Osy jobada nekeni qııýdyń, toqtatýdyń, ony jaramsyz dep tanýdyń sharttary men tártibi aıqyndalǵan, erli-zaıyptylardyń, balanyń (balalardyń), ata-analardyń, bala asyrap alýshylardyń quqyqtary men mindetteri naqtylandy.
Sondaı-aq balany asyrap alýdyń tártibi, qorǵanshylyq pen qamqorshylyqty retteý máseleleri, otbasy músheleriniń, erli-zaıyptylardyń, burynǵy erli-zaıyptylardyń jáne otbasynyń basqa da músheleriniń alımenttik mindettemeleri bekitildi.
Odan basqa Qazaqstan Respýblıkasynyń neke-otbasy zańnamasy normalarynyń sheteldikterge jáne azamattyǵy joq adamdarǵa qoldanylý erekshelikteri jáne taǵy basqalar aıqyndaldy.
Kodekste sýrrogat ana, balany tárbıeleýge berý týraly kelisim jasaý jáne ony buzý, azamattyq ahýal aktilerin memlekettik organdardyń tirkeýi máselelerin retteıtin jańa erejeler bar.
Tujyrymdamalyq turǵyda maquldanǵan joba palata qaraýyna jiberildi.
