Senat komıtetinde memlekettik qyzmet máselelerine arnalǵan zań jobasy talqydan ótti
ASTANA. 16 qarasha. QazAqparat - Búgin Qazaqstan Respýblıkasy Parlamenti Senatynyń Konstıtýtsııalyq zańnama, sot júıesi jáne quqyq qorǵaý organdary komıtetinde memlekettik qyzmet máseleleri boıynsha elimizdiń zańnamalyq aktilerine ózgerister men tolyqtyrýlardy talqylaý jónindegi jumys tobynyń otyrysy bolyp ótti.
Zań jobasynyń tujyrymdamasyn qaraý barysynda ol 2011 jylǵy shilde aıynda bekitilgen Memlekettik qyzmettiń jańa úlgisi tujyrymdamasy men Memleket basshysynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» baǵdarlamalyq maqalasynda aıtylǵan mindetterdi iske asyrý maqsatynda ázirlengeni atalyp ótildi.
Zań jobasy meılinshe laıyqty mamandardy tańdalýyn, olardyń jeke eńbegin taný turǵysynda kásibı jáne mansaptyq turǵyda ilgerileýin qamtamasyz etýge baǵyttalǵan.
Zań jobasynyń negizgi basymdyqtary: mamandardy tańdaýda jáne ilgeriletýde merıtokratııa (eńbegin taný) qaǵıdalaryn kúsheıtý, «A» basqarý korpýsyn qurý, personaldar ınstıtýttary men basqarý tetikterin jetildirý, kadrlyq qyzmetterdiń mártebesi men ókilettikterin arttyrý, tártiptik jáne etıkalyq baqylaýdy kúsheıtý, korporatıvtik mádenıetti jetildirý bolyp tabylady.
Osy maqsatta zań jobasynda tıimdilikti, memlekettik qyzmetke tańdaýdaǵy konkýrs tártibiniń ádildigi men aıqyndyǵyn arttyrý, konkýrstan tys taǵaıyndaýlar múmkindikterin qysqartý, laýazymdy adamdardyń zańsyz kadrlyq sheshimderge jaýapkershiligin kúsheıtý qarastyryldy. Zańda Memlekettik qyzmetshilerdiń ar-namys kodeksi men jemqorlyqqa qarsy erejeleri bar qyzmet etıkasynyń jeke taraýy alǵash ret qaralyp otyr.
Qujattyń erejelerin iske asyrý úshin Kadr saıasaty jónindegi ulttyq komıssııa men aımaqtyq komıssııalar qurylady, tálimgerler, mansaptyq josparlaý men almastyrý ınstıtýty engiziledi. Osy zań jobasy qabyldanýynyń negizgi kórsetkishteri retinde: kadrlardy daıarlaý júıesine halyq senimin arttyrý, merıtokratııa qaǵıdalary saqtalýyna memlekettik qyzmetshilerdiń senimin, olardyń kásibı biliktiligin, qyzmet etıkasynyń saqtalýyn baqylaýdyń tıimdiligin, memlekettik qyzmet kórsetýler sapasyn kóterý bolyp tabylady.
