Senat komıtetinde memlekettik áleýmettik tapsyrys jónindegi zań jobasy talqylandy

ASTANA. 27 qazan. QazAqparat /Qanat Mámetqazyuly/ - Búgin QR Parlamenti Senaty Áleýmettik mádenı damý komıtetiniń keńeıtilgen otyrysy bolyp ótti.

Onda «Qazaqstan Respýblıkasynyń keıbir zańnamalyq aktilerine memlekettik áleýmettik tapsyrys máseleleri boıynsha ózgerister men tolyqtyrýlar engizý týraly» zań jobasy talqylandy.

Atalǵan zań jobasy úkimettik emes uıymdardy memleket tarapynan qoldaý júıesin odan ári jetildirýdi kózdeıdi. Qujat sonymen qatar memlekettik áleýmettik tapsyrysty júzege asyrý barysynda týyndaıtyn qoǵamdyq qatynastar sýbektilerine bólinetin qarajatty tıimdi ıgerýdegi jaýapkershilikti arttyrady. Buǵan qosa zań jobasy memlekettik áleýmettik tapsyrysty bólý kezinde memlekettik saıasattyń basym tustaryn jáne respýblıka men jekelegen óńirlerdiń áleýmettik ekonomıkalyq damý qajettilikterin esepke alýdy qarastyrady.

Osyǵan baılanysty zań jobasyndaǵy túzetýlerdiń negizgi bóligi memlekettik áleýmettik tapsyrys máseleleri boıynsha quqyqtyq keńistikti jetildirýge baǵyttalǵan. Sonymen qatar qujatqa memlekettik áleýmettik tapsyrysty qalyptastyrý men iske asyrý úderisinde memlekettik organdardyń ózara is-áreketin reglamentteıtin normalar engizilip otyr. Zań jobasynda Úki­met­tiń, ýákiletti jáne memlekettik organdardyń quzyretteri naqty belgilengen. Bul rette buryndary memlekettik áleýmettik tapsyrystardy bir mınıstrlik berip kelse, endi ony ár vedomstvo óz quzyreti sheńberinde júzege asyra alatyn bolady.