Senat komıtetinde keıbir zańnamalyq aktilerge bıýdjet protsesin jetildirý týraly zań jobasy talqylandy
ASTANA. Naýryzdyń 2-si. QazAqparat - Búgin Senattyń Qarjy jáne bıýdjet komıtetinde «Qazaqstan Respýblıkasynyń keıbir zańnamalyq aktilerine bıýdjet protsesin jetildirý máseleleri boıynsha ózgerister men tolyqtyrýlar engizý týraly» zań jobasy talqylandy,
dep habarlaıdy Senattyń baspasóz qyzmeti.
Zań jobasy túpki nátıjege baǵdarlanǵan bıýdjettik josparlaýdy odan ári jetildirý, memlekettik josparlaý júıesine sáıkestendirý, sondaı-aq respýblıkalyq jáne jergilikti deńgeıdegi qarjy baqylaý júıesiniń tutastyǵyn qamtamasyz etý maqsatynda ázirlendi.
Zań jobasymen Bıýdjet jáne Salyq kodeksterine, sondaı-aq «Ákimshilik rásimderi týraly», «Normatıvtik quqyqtyq aktiler týraly», «Kontsessııalar týraly», «Memlekettik satyp alý týraly» jáne «Qazaqstan Respýblıkasyndaǵy memlekettik jáne jergilikti ózin-ózi basqarý týraly» zańdarǵa ózgerister men tolyqtyrýlar engiziletin boldy.
Atap aıtqanda, Bıýdjet kodeksine memlekettik qarjy baqylaý jáne josparlaý júıesi, memlekettik qyzmet kórsetýler, bıýdjetaralyq qatynastardy jetildirý, bıýdjetti oryndaý jáne ınvestıtsııalyq rásimderdi jetildirýge qatysty ózgerister engiziletin boldy.
Bıýdjetaralyq qatynastardy jetildirý aıasynda maqsatty transfertterdi damýǵa paıdalanýdaǵy jergilikti organdardyń quqyqtary keńeıedi.
Salyq kodeksine ýákiletti organnyń ókilettigin jáne salyq tóleýshige memlekettik qyzmet kórsetýler standarttaryn usynýdy naqtylaıtyn ózgerister enetin boldy.
Zań jobasyn palatanyń qaraýyna usyný týraly sheshim qabyldandy.
