Senat komıtetinde ıslamdyq qarjylandyrýdy uıymdastyrý týraly zań jobasy qaraldy
ASTANA. 17 maýsym. QazAqparat - Búgin Senattyń Qarjy jáne bıýdjet komıtetinde «Qazaqstan Respýblıkasynyń keıbir zańnamalyq aktilerine ıslamdyq qarjylandyrýdy uıymdastyrý máseleleri boıynsha ózgerister men tolyqtyrýlar engizý týraly» zań jobasy qaraldy.
Senat otyrysynda birinshi oqylymda maquldanǵan zań jobasyndaǵy «memlekettik emıssııalyq baǵaly qaǵaz» uǵymy keńeıe túsetin bolady.
Atap aıtqanda, memlekettik ıslamdyq baǵaly qaǵaz memlekettik emıssııalyq baǵaly qaǵaz bolyp tabylady, ony ustaýshynyń qosalqy jaldaý sharty negizinde aktıvterdi paıdalanýdan túsken tabystardy alýǵa quqyqtaryn kýálandyratyn bolady.
Zań jobasymen ondaǵy erejelerdi qoldanystaǵy zańnamanyń basqa erejelerimen sáıkestendirýge baǵyttalǵan ózgerister de engiziletin bolady.
Zań jobasy palatanyń qaraýyna usynyldy.
