Senat komıtetinde halyqaralyq úsh qujat qaraldy
ASTANA. QazAqparat - Búgin Qazaqstan Respýblıkasy Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetinde «Esirtki, psıhotroptyq zattar men olardyń prekýrsorlaryn Keden odaǵynyń keden aýmaǵy arqyly ótkizý tártibi týraly kelisimdi ratıfıkatsııalaý týraly» zań jobasy qaraldy.
Kelisim 2013 jylǵy 24 qazanda Máskeýde jasalǵan bolatyn.
Esirtki quraldary týraly biryńǵaı konventsııaǵa, Psıhotroptyq zattar týraly konventsııaǵa, Birikken Ulttar uıymnyń esirtki quraldary men psıhotroptyq zattardyń zańsyz aınalymyna qarsy kúres týraly konventsııasyna jáne Keden odaǵy men Biryńǵaı ekonomıkalyq keńistik aıasynda bekitilgen halyqaralyq kelisimderge sáıkes ázirlengen bolatyn.
Zań jobasyn qabyldaý esirtki, psıhotroptyq zattar men olardyń prekýrsorlaryn Keden odaǵy men Biryńǵaı ekonomıkalyq keńistiktiń keden aýmaǵy arqyly ótkizý tetikteri men tártibin retteýge múmkindik beredi. Jeke adamdar bul quraldardy syrqaty boıynsha rastalǵan dárigerlik qujattary bolǵanda jeke paıdalanýy úshin dári-dármek túrinde Taraptar zańnamasynda belgilengen kólemde shektelgen mólsherin alyp júre alady.
Sondaı-aq komıtette «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Sot tóreligi sektoryn ınstıtýtsıonaldyq nyǵaıtý jobasy) ratıfıkatsııalaý týraly» zań jobasy qaraldy.
Kelisim maqsaty Sot tóreligi sektoryndaǵy negizgi uıymdardyń ınstıtýtsıonaldyq múmkindikteri men operatsııalyq tıimdiligin arttyrý bolyp tabylady.
Joba aıasynda myna bólikter júzege asyrylady: quqyqtyq jáne ınstıtýtsıonaldyq bazanyń negizgi bólikterin iske asyrýdy nyǵaıtý; Qazaqstan Respýblıkasy Ádilet mınıstrligi qyzmetiniń sapasyn jáne jedeldigin arttyrý; sýdıalardyń tıimdiligi men kásibı biliktiligin kórsetý.
Komıtette odan basqa «Qylmystyq áreketten túsken tabystardy jylystatý, anyqtaý, alyp qoıý jáne tárkileý týraly konventsııany ratıfıkatsııalaý týraly» Qazaqstan Respýblıkasynyń Zańyna ózgeris engizý týraly» zań jobasy da qaraldy.
Zań jobasy 2011 jylǵy 2 mamyrdaǵy Qazaqstan Respýblıkasynyń zańymen ratıfıkatsııalanǵan Qylmystyq áreketten túsken tabystardy jylystatý, anyqtaý, alyp qoıý jáne tárkileý týraly konventsııaǵa osy konventsııanyń erejelerin eskere otyryp, jańa redaktsııadaǵy túsindirme berýdi kózdeıdi.
Qujattar Palatanyń qaraýyna jiberildi.
