Senat komıtetinde halyqaralyq qujat qaraldy
ASTANA. QazAqparat - Búgin Qazaqstan Respýblıkasy Parlamenti Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysynda «2009 jylǵy 6 qazandaǵy Qazaqstan Respýblıkasynyń Úkimeti men Frantsýz Respýblıkasynyń Úkimeti arasyndaǵy Jerdi qashyqtyqtan zondtaýdyń ǵarysh júıesin jáne ǵarysh apparattarynyń qurastyrý-synaý keshenin qurý men paıdalaný sharttary týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasy qaraldy.
Hattamanyń maqsaty Jerdi qashyqtan zondtaý ǵarysh júıesin jáne ǵarysh apparattaryn qurastyrý-synaq keshenin jasaý jónindegi jobalardy iske asyrý aıasynda frantsýz tarapy atqaratyn jumystar men qyzmet kórsetýlerge salynatyn qosymsha qun salyǵyn tóleýden bosatý bolyp tabylady. Bul memleket iske asyratyn ınnovatsııalyq jobalardyń qunyn azaıtady, soǵan sáıkes, respýblıkalyq bıýdjettiń qazirgi kezdegi aýyrtpalyǵyn tómendetedi, sondaı-aq jobanyń aqtaý merzimin qysqartady.
Kelisimge 2009 jylǵy 6 qazanda qol qoıyldy. Frantsýz tarapyn qosymsha qun salyǵynan bosatý máselesi Respýblıkalyq bıýdjet komıssııasynda qaraldy jáne oń qorytyndy berildi. Frantsýz Respýblıkasynyń Prezıdenti F.Ollandtyń ótken jylǵy jeltoqsandaǵy memlekettik sapary aıasynda Kelisimge ózgerister men tolyqtyrýlar engizý týraly osy Hattamaǵa qol qoıylǵan bolatyn. Qujat Palatanyń qaraýyna jiberildi.
