Senat komıtetinde Eýrazııa ekonomıkalyq qoǵamdastyǵyndaǵy eksporttyq baqylaýdyń biryńǵaı tártibi týraly kelisim qaraldy
ASTANA. QazAqparat - Búgin Qazaqstan Respýblıkasy Parlamenti Senaty Ekonomıkalyq damý jáne kásipkerlik komıtetiniń keńeıtilgen otyrysynda «Eýrazııa ekonomıkalyq qoǵamdastyǵyna múshe memleketterdiń eksporttyq baqylaýynyń biryńǵaı tártibi týraly kelisimniń kúshin joıý týraly» zań jobasy qaraldy.
Zań jobasy Memleket basshysynyń 2013 jylǵy jeltoqsandaǵy tapsyrmasyn iske asyrý maqsatynda ázirlengen bolatyn. Kelisimge 2003 jylǵy qazanda qol qoıyldy jáne Qazaqstan Respýblıkasy ony 2005 jylǵy jeltoqsanda ratıfıkatsııalady. Qyrǵyz Respýblıkasy men Tájikstan Respýblıkasy EýrAzEQ-nyń biryńǵaı keden aýmaǵyna qosylǵan kezden bastap kúshine enetin jekelegen baptardy qospaǵanda, Kelisim 2007 jylǵy jeltoqsanda kúshine endi.
Atalǵan baptarda, olar kúshine engen jaǵdaıda, EýrAzEQ-ǵa múshe memleketterdiń (Qazaqstan, Reseı, Belarýs, Qyrǵyzstan jáne Tájikstan) aýmaǵy boıynsha eksporttyq baqylaýǵa jatatyn taýarlar men tehnologııalardyń erkin tasymaldanýy kózdeledi. Eksporttyq baqylaýǵa jatatyn ónim jappaı qyryp-joıatyn qarý, jaı qarý-jaraq jasaý úshin yqtımal paıdalaný, sondaı-aq tikeleı terrorıstik áreket úshin paıdalaný turǵysynan qaýip tóndiredi.
Zań jobasy Palatanyń qaraýyna jiberildi.
