Senat komıtetinde esirtki, psıhotroptyq zattar, prekýrsorlar jáne olardyń zańsyz aınalymy men teris paıdalanylýy týraly zań jobasy qaraldy
ASTANA. 5 sáýir. QazAqparat - Búgin Senattyń Zańnama jáne quqyqtyq reformalar komıtetinde «Esirtki, psıhotroptyq zattar, prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly»
Qazaqstan Respýblıkasynyń Zańyna tolyqtyrýlar engizý týraly» zań jobasy qaraldy.
Zań jobasy Qazaqstanda baqylaýǵa jatatyn esirtki, psıhotroptyq zattar, prekýrsorlar tizimine esirtki zattardyń jańa túrlerin engizý maqsatynda ázirlendi.
Atap aıtqanda, tizim sıntetıkalyq kannabınoıdtar sekildi zattarmen tolyqtyryla túsedi. Zańsyz aınalymda júrgen jerinen tabylǵan esirtki, psıhotroptyq zattar, prekýrsorlardy az, iri jáne asa iri mólsherge jatqyzý týraly qosymsha keste de tolyqtyrylady.
Jobaǵa zań alǵash ret resmı jarııalanǵan kúnnen bastap emes, odan on kún ótkennen keıin kúshine enetini týraly ózgeris engizildi.
Zań jobasy palata qaraýyna jiberildi.
