Senat komıtetinde eńbek qaýipsizdigi men gıgıenasy júıesin jetildirýge qatysty zań jobasy qaraldy
ASTANA. QazAqparat - Búgin Qazaqstan Respýblıkasy Parlamenti Senaty Áleýmettik-mádenı damý jáne ǵylym komıtetiniń keńeıtilgen otyrysynda «Eńbek qaýipsizdigi men gıgıenasyna járdemdesetin negizder týraly konventsııany (187-konventsııa) ratıfıkatsııalaý týraly» zań jobasy qaraldy.
Qujat 2006 jylǵy 15 maýsymda Jeneva qalasynda Halyqaralyq eńbek uıymy Bas konferentsııasynyń 95-shi sessııasynda qabyldandy.
Konventsııanyń maqsaty - ókiletti jumys berýshi uıymdarmen jáne jumysshylarmen konsýltatsııalar negizinde ulttyq saıasat, ulttyq júıe jáne ulttyq baǵdarlamalar ázirleý arqyly óndiristik jaraqat, kásiptik aýrýǵa shaldyǵý jáne óndiriste adamdardyń qaza bolý jaǵdaılaryn eskertý. Konventsııanyń erejeleri ekonomıka qyzmetindegi barlyq salaǵa jáne jumysshylardyń barlyq toptaryna qoldanylady. Qazaqstan Respýblıkasynyń osy Konventsııaǵa qatysýy jáne onyń erejelerin ulttyq zańnama arqyly iske asyrý jumys berýshilerdiń eńbek qaýipsizdigi men gıgıenasy salasyndaǵy jaýaptylyǵyn arttyrady jáne óndiriste jaraqat alý jáne kásiptik aýrýǵa shaldyǵý deńgeıin tómendetedi. Zań jobasy Palatanyń qaraýyna jiberildi.
