Senat komıtetinde elimizdiń kóktemgi sý tasqynynan zardap shekken eldi mekender men halyqty qorǵaý jáne kómek berý máselesi qaraldy
ASTANA. 11 sáýir. QazAqparat - Búgin Parlament Senatynda palata tóraǵasynyń orynbasary Qaırat Işanovtyń qatysýymen elimizdiń kóktemgi sý tasqynynan zardap shekken eldi mekenderin, onyń ishinde Ońtústik Qazaqstan oblysynyń halqyn qorǵaý jáne kómek berý máselesi qaraldy.
Tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysy aıasynda bolǵan talqylaýǵa Senat depýtattary, tótenshe jaǵdaılar, aýyl sharýashylyǵy, ekonomıkalyq damý jáne saýda, qarjy mınıstrlikteri, sondaı-aq qurylys jáne turǵyn úı-kommýnaldyq sharýashylyq, jer resýrstaryn basqarý agenttikteriniń basshylary, Ońtústik-Qazaqstan oblysynyń aktıvti qatysty.
Otyrysty ashqan Q.Işanov tabıǵat qubylystarynan týyndaǵan tótenshe jaǵdaılardy eskertý máselesi Memleket basshysynyń udaıy nazarynda ekenin atap ótti. Onyń tapsyrmasy boıynsha sý tasqyny qaýipti aımaqtardyń bárine monıtorıng júrgizilip, turǵyndar arasynda túsindirý jumystary júzege asyrylýda.
Tóraǵa orynbasary aıtqandaı, aımaqtardaǵy sý tasqyndarynyń zardaptaryn joıý máselesi depýtattardyń Mınıstrler kabınetiniń basshysy K.Másimovke joldaǵan ujymdyq saýalynda aıtyldy. Qujatta sondaı-aq zııan kelgen nysandardy qalpyna keltirý, sý tasqynanan zardap shekken turǵyndarǵa kómek berý jónindegi sharalar týraly Úkimet habaryn tyńdaý nıeti de atap kórsetildi.
Osyǵan baılanysty komıtettiń keńeıtilgen otyrysy Senat Tóraǵasy Q.Mámıdiń tapsyrmasy boıynsha ótkizilgeni aıtylyp, tótenshe jaǵdaılardyń aldyn alý, tasyǵan sýdy tıimdi paıdalaný jónindegi sharalar ázirleý úshin osy talqylaýdyń paıdaly bolatynyna tóraǵa orynbasary senim bildirdi.
Keńeıtilgen otyrysta elimizdiń tótenshe jaǵdaılar mınıstri V.Bojko baıandama jasap, depýtattardyń saýaldaryna jaýap berdi. Sondaı-aq Ońtústik-Qazaqstan oblysy ákiminiń orynbasary S.Qanybekovtiń aqparaty da tyńdaldy. S.Qanybekovtiń aıtýynsha, sý tasqynynan zardap shekken turǵyndar shyǵyndarynyń ornyn toltyrý, Ońtústik-Qazaqstan oblysyndaǵy búlingen obektilerdi jónge keltirý úshin bıýdjetten 787, 363 mıllıon teńge bólý qajet.
Talqylaý barysynda sóz sóılegen depýtattar sý tasqynynyń qaýipsiz ótýin qamtamasyz etýde memlekettik organdardyń ózara tıimdi áreketi, tótenshe jaǵdaılar kezinde múlikterdi saqtandyrýǵa oraı halyq arasynda keńinen túsindirý jumystaryn júrgizý qajettigi jónindegi óz usynystaryn aıtty.
