Senat komıtetinde birqatar zań jobalary jáne Joǵarǵy Sot sýdıasyna kandıdattardy saılaý máseleleri qaraldy

Kodeks jobasy qylmysty tergeý rásimderin ońaılatý jáne jedeldetýge, oǵan qosa qylmystyq úderiske tartylǵan adamdardyń konstıtýtsııalyq quqyqtary joǵary deńgeıde qorǵalýyn qamtamasyz etý, sot tóreligin júrgizýdiń tıimdiligin arttyrý maqsatynda qylmystyq sot óndirisin jetildirý, sondaı-aq halyqaralyq standarttarǵa sáıkes keltirýge baǵyttalǵan.

Sondaı-aq komıtette «Qazaqstan Respýblıkasynyń keıbir zańnamalyq aktilerine qylmystyq-protsestik zańnamany jetildirý máseleleri boıynsha ózgerister men tolyqtyrýlar engizý týraly» zań jobasy da qaraldy.

Zań jobasy qoldanystaǵy zańnamany Qylmystyq-is júrgizý kodeksiniń jobasymen sákestendirýge baǵyttalǵan.

Atap aıtqanda, zań jobasy sotqa deıingi tergeý óndirisin bastaýdy retteıdi, anyqtaý jáne tergeý organdarynyń qyzmetinde jasyryn tergeý is-qımylyn qoldaný, sondaı-aq qylmystyq isti qozǵaý kezeńderinde jáne tergeýge deıingi jáne taǵy basqa tekserýdi retteıtin erejelerdi alyp tastaýdy kózdeıdi.

Zań jobasymen 38 zańnamalyq aktige: Azamattyq is júrgizý kodeksi, «Salyq jáne bıýdjetke tólenetin basqa da mindetti tólemder týraly» kodekske, «Qazaqstan Respýblıkasyndaǵy keden isi týraly» kodekske, «Jedel-izdestirý qyzmeti týraly», «Prokýratýra týraly», «Qazaqstan Respýblıkasyndaǵy ulttyq qaýipsizdik organdary týraly», «Advokattyq qyzmet týraly» jáne basqa zańdarǵa ózgerister men tolyqtyrýlar engiziledi.

Búgin «Qazaqstan Respýblıkasynyń keıbir konstıtýtsııalyq zańdaryna qylmystyq-protsestik zańnamany jetildirý máseleleri boıynsha ózgerister engizý týraly» zań jobasy birinshi oqylymda qaraldy.

Zań jobasy birqatar konstıtýtsııalyq zańdardy Qylmystyq-is júrgizý kodeksiniń jobasymen sáıkestendirýge baǵyttalǵan.

Qujatpen bes konstıtýtsııalyq zańǵa: «Qazaqstan Respýblıkasyndaǵy saılaý týraly», «Qazaqstan Respýblıkasynyń Parlamenti jáne onyń depýtattarynyń mártebesi týraly», «Qazaqstan Respýblıkasyndaǵy Konstıýtsııalyq Keńesi týraly», «Qazaqstan Respýblıkasynyń Tuńǵysh Prezıdenti - Elbasy týraly», «Qazaqstan Respýblıkasyndaǵy sot júıesi jáne sottardyń mártebesi týraly» zańdaryna ózgerister engiziledi.

Qylmystyq-is júrgizý kodeksiniń erejelerine sáıkes bultartpaý sharalary qatarynan qamaýǵa alý alynyp tastalady da ustaýda bolýmen almastyrylady. Bul rette Qylmystyq kodeks jobasyna sáıkes, qamaýǵa alý qylmystyq áreket jasaǵany úshin jaza retinde qoldanylatyn bolady. Osyǵan baılanysty, joǵaryda aıtylǵan konstıtýtsııalyq zańdarǵa tıisti birqatar ózgerister engiziletin bolady.

Komıtet otyrysynda Qazaqstan Respýblıkasynyń Qylmystyq atqarý kodeksiniń jobasy da birinshi oqylymda qaraldy. Kodeks jobasy sottalǵandardyń quqyqtary men zańdy múddeleriniń qorǵalý deńgeıin eleýli túrde kóterý jáne qylmystyq jazalardy oryndalý tıimdiligin arttyrý maqsatynda qylmystyq-atqarý zańnamasyn odan ári jetildirýge baǵyttalǵan.

Qujat bostandyqtan aıyrýǵa, penıtentsıarlyq jáne penıtentsıardan keıingi retsıdıv deńgeıin tómendetý, sottalǵandardyń áleýmetke beıimdelýine baılanysty emes jazalardyń keńinen qoldanýyna jaǵdaı jasaıdy, sondaı-aq sottalǵandarmen júrgiziletin tárbıeleý úderisterine jurtshylyqtyń qatysý tetikterin qalyptastyrady.

Zań jobalary palatanyń qaraýyna jiberildi.

Komıtette qyzmetin doǵarýyna baılanysty Qazaqstan Respýblıkasy Joǵarǵy Sotynyń sýdıasy Nıkolaı Mamontovty jáne Nurııa Senǵalıevany qyzmetinen bosatý týraly Qazaqstan Respýblıkasy Prezıdentiniń usynýy qaraldy.

Odan basqa, Qazaqstan Respýblıkasy Prezıdentiniń Joǵary Sot Keńesi usynymyna negizdelgen usynýy boıynsha Serik Abdyrahmanov pen Meıram Janǵuttınovty Qazaqstan Respýblıkasy Joǵarǵy Sotynyń sýdıasy etip taǵaıyndaý týraly másele de qaraldy.

Otyrys qorytyndysy boıynsha Joǵarǵy Sot sýdıasyna kandıdattardy Palatanyń qaraýyna engizý týraly sheshim qabyldandy.