Senat komıtetinde birqatar zań jobalary qaraldy
ASTANA. QazAqparat - 23 jeltoqsanda Qazaqstan Respýblıkasy Parlamenti Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Táýelsiz Memleketter Dostastyǵy sheńberinde qupııa aqparatty qorǵaý týraly kelisimdi ratıfıkatsııalaý týraly» zań jobasy qaraldy.
Kelisimniń maqsaty Táýelsiz Memleketter Dostastyǵy aıasyndaǵy yntymaqtastyq kezinde qupııa aqparattardy qorǵaýdy qamtamasyz etý bolyp tabylady.
Kelisim on jeti bapta mazmundalǵan, qujatta onyń maqsaty men iske asyrý barysynda qoldanylatyn termınder men anyqtamalardyń mán-maǵynasy berilgen, qupııa aqparatty qorǵaý sharalary týraly erejeler jáne Kelisimniń kúshine ený tártibi kózdelip otyr.
Kelisimge qatysýshy taraptar úshin mańyzdylyq dárejesin eskere kelgende, onda qupııa aqparattardy qorǵaý sharalary, atap aıtqanda, kóshirme jasaý, kóbeıtý, joıý jáne qupııa aqparatty berý máseleleri de rettelgen.
Sondaı-aq Senat depýtattarynyń nazaryna Qazaqstan men Ázerbaıjan Úkimetteri arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly zań jobasy da usynyldy.
Kelisimniń mán-maǵynasy azamattyq qorǵanys, tótenshe jaǵdaılardyń aldyn alý jáne olardy joıý, apat jáne basqa da aýyrtpalyq jaǵdaıynda erikti túrde jáne ózara kómek kórsetýge mamandardy oqytý salasyndaǵy eki eldiń quzyretti organdarynyń ózara is-qımyl tártibin belgileý bolyp tabylady.
Qujatta ony iske asyrý barysynda qoldanylatyn termınder men anyqtamalary da berilip otyr. Ózara is-qımyldyń quzyretti organdary belgilenip, taraptar yntymaqtastyǵynyń túrlerine nazar aýdaryldy. Kelisim aıasyndaǵy yntymaqtastyq túrleri aqparat jáne tájirıbe almasý, birlese josparlaý jáne basqa da sıpatta bolýy múmkin.
Komıtettiń keńeıtilgen otyrysynda «Qazaqstan Respýblıkasynyń Ulttyq ulany týraly» zań jobasy jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq ulany, Qarýly Kúshteri jáne Memlekettik kúzet qyzmeti máseleleri boıynsha ózgerister engizý týraly» ilespe zań jobasy da qaraldy.
«Qazaqstan Respýblıkasynyń Ulttyq ulany týraly» zań jobasy Qazaqstan Respýblıkasy Ulttyq ulanynyń qyzmeti salasyndaǵy qoǵamdyq qatynastardy retteýge baǵyttalǵan.
Qazaqstan Respýblıkasynyń Ulttyq ulany adamdardyń, qoǵam men memlekettiń qaýipsizdigin, adam men azamattardyń quqyqtary men bostandyqtaryn qylmystyq jáne quqyqqa qarsy qol suǵýshylyqtardan qorǵaýdy qamtamasyz etýge arnalǵan. Zań jobasynda Ulttyq ulannyń mindeti men ókilettigi, onyń quramy men qyzmetin uıymdastyrý naqty aıqyndalǵan. Ulttyq ulannyń Bas qolbasshylyǵy jedel strategııalyq organ retinde jaýyngerlik jáne jumyldyrýǵa ázirlik sharalaryn uıymdastyrady jáne júzege asyrady, basqa áskerlermen jáne áskerı qurylymdarmen ózara is-qımyldy iske asyryp, normatıvtik erejeler ázirleıdi jáne bekitedi.
Ulttyq ulanda qyzmet etýdiń erekshe sıpatyna oraı áskerı qyzmetshiler men olardyń otbasy múshelerine áleýmettik kepildikter men turǵyn úı quqyqtary da zańda kórinis tapty.
«Qazaqstan Respýblıkasynyń Ulttyq ulany týraly» zań jobasynyń erejeleri men birqatar zańnamalyq aktilerdiń jekelegen erejelerin sáıkestendirý maqsatynda ilespe zań jobasynda túzetýler kózdelip otyr.
Zań jobalary Palatanyń qaraýyna jiberildi.
