Senat komıtetinde Baıqońyr ǵarysh aılaǵynyń personalyna, qalanyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly zań jobasy talqylandy
ASTANA. Mamyrdyń 7-si. QazAqparat - Búgin Senattyń Áleýmettik-mádenı damý komıtetinde «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Reseı Federatsııasynyń «Baıqońyr» keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimdi ratıfıkatsııalaý týraly» zań jobasy talqylandy.
Zań jobasynyń maqsaty «Baıqońyr» ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq kómek kórsetý tártibin jetildirýdi kózdeıtin osy Kelisimdi ratıfıkatsııalaý bolyp tabylady.
Atap aıtqanda, ǵarysh aılaǵynyń personalyna jáne Baıqońyr qalasynyń turǵyndaryna medıtsınalyq kómek kórsetýdi Reseıdiń densaýlyq saqtaý uıymdary, al Tóretam jáne Aqaı kentteriniń turǵyndaryna - Qazaqstannyń densaýlyq saqtaý uıymdary júzege asyratyn bolady.
Zań jobasy palatanyń qaraýyna usynylady.
