Senat komıtetinde Balqash torabyn paıdalaný jóninde Reseımen kelisimdi ratıfıkatsııalaý týraly zań jobasy qaraldy
ASTANA. QazAqparat - 29 qyrkúıekte Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstandyq Balqash torabyn berý sharttary jáne ony zymyran shabýyly týraly Reseı eskertý júıesinde odan ári paıdalaný tártibi týraly kelisimdi ratıfıkatsııalaý týraly» zań jobasy qaraldy.
2014 jylǵy 2 jeltoqsanda Máskeýde jasalǵan Kelisim Qazaqstan aýmaǵynda ornalasqan Balqash torabyn Reseı tarapyna berý sharttaryn jáne ony odan ári paıdalaný tártibin aıqyndaýǵa baǵyttalǵan. Sondaı-aq Balqash torabynyń ınfraqurylymyn belgilengen maqsatta ǵana paıdalaný jáne nysandy taraptardyń birlesip paıdalanýyna kezeń-kezeńmen kóshýdi uıymdastyrý kózdeledi.
Qujat jyljymaly jáne jyljymaıtyn múlikti qabyldaý men berý jáne ony túgendeý tártibin retteıdi. Zalaldy óteý, daýlar men kelispeýshilikterdi sheshý tártibi týraly erejeler de belgilendi.
Kelisimdi ratıfıkatsııalaý Qazaqstandyq Balqash torabyn odan ári paıdalaný máselesin zańnamalyq retteýge múmkindik beredi, sondaı-aq ony paıdalanýda jańa tásilderdi ázirleýge qyzmet etedi.
Zań jobasy Palatanyń qaraýyna jiberildi.
