Senat komıtetinde balanyń quqyqtaryn qorǵaý týraly zań jobasy qaraldy

Zań jobasynyń maqsaty balalardy áleýmettik ortanyń teris yqpalynan qorǵaýdyń tıimdiligin arttyrý, sondaı-aq quqyq qoldaný praktıkasynyń basymdyqtaryn jazalaý-qýǵyndaý sharalarynan profılaktıkalyq jáne qorǵaý fýnktsııalaryna qaraı ózgertý bolyp tabylady.

Zań jobasymen elimizdiń Qylmystyq, Qylmystyq is júrgizý, Azamattyq is júrgizý, Ákimshilik quqyq buzýshylyq týraly kodeksterine, sondaı-aq «Buqaralyq aqparat quraldary týraly», «Qazaqstan Respýblıkasyndaǵy balanyń quqyqtary týraly», «Kámeletke tolmaǵandar arasyndaǵy quqyq buzýshylyqtardyń profılaktıkasy men balalardyń qadaǵalaýsyz jáne panasyz qalýynyń aldyn alý týraly» zańdarǵa ózgerister men tolyqtyrýlar engizý kózdelip otyr. Zań jobalarymen atalǵan zańnamalyq aktilerge:

- urlyq jasaǵany (175-baptyń ekinshi, úshinshi bólikteri), tonaǵany (178-baptyń ekinshi, úshinshi bólikteri) jáne qorqytyp alǵany (181-baptyń ekinshi, úshinshi bólikteri) úshin adamnyń qylmystyq jaýaptylyǵy týyndaıtyn jasyn (14 jastan 16 jasqa deıin) ózgertý;

- kámeletke tolmaǵandardyń jynystyq tıispeýshiligine qarsy qylmystar nemese nápsiqumarlyq sıpattaǵy ózge de is-áreketter úshin Qylmystyq kodekstiń sanktsııalaryn qataıtý;

- kámeletke tolmaǵandardyń pornografııalyq beıneleri bar materıaldardy nemese zattardy jasaǵany, aınalysqa engizgeni, taratqany, jarııa kórsetkeni nemese jarnamalaǵany úshin, sol sııaqty on segizge tolǵan adamnyń pornografııalyq sıpattaǵy oıyn-saýyq is-sharalaryna qatysý úshin oryndaýshylar retinde kámeletke tolmaǵandardy tartqany úshin qylmystyq jaýaptylyqty belgileý bóliginde túzetýler engiziledi.

Depýtattardyń saýaldaryna ishki ister mınıstriniń orynbasary A.Kýlınıch jaýap berdi. Tujyrymdamalyq turǵyda maquldanǵan zań jobasy palata qaraýyna jiberiletin boldy.