Senat komıtetinde aýyl sharýashylyǵy kooperatıvteriniń qyzmetin jáne jer qatynastaryn retteıtin zań jobalary qaraldy
ASTANA. QazAqparat - 1 qazanda Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysynda «Aýyl sharýashylyǵy kooperatıvteri týraly» zań jobasy qaraldy.
Zań jobasynyń maqsaty aýyl sharýashylyǵy kooperatıvteriniń jáne olardyń qaýymdastyqtarynyń qyzmetterin quqyqtyq retteý, sondaı-aq osy saladaǵy zańnamany jetildirý bolyp tabylady.
Bul zańdy qabyldaýdyń qajettigi qazirgi kezdegi qoldanystaǵy quqyqtyq erejeler aýyl sharýashylyǵy kooperatıvteriniń óndiristik qyzmeti úshin jetkilikti jaǵdaı jasaı almaıtynyna baılanysty bolyp otyr. Atap aıtqanda, kooperatıvterde kommertsııalyq uıym mártebesi bolmaǵandyqtan, fermerlerdiń qyzmet kórsetetin aýyl sharýashylyq kooperatıvterine birlesýin yntalandyratyn faktor jetispeıdi. Kooperatıvterdiń barlyq túrleri jeńildetilgen nesıeler men salyqtyq jeńildikterge qol jetkize almaı keledi. Birqatar máseleler úılestirý organdarynyń (qaýymdastyqtar, aýdıttik odaqtar jáne t.b.) joqtyǵynan týyndady.
Zań jobasyn qabyldaý aýyl sharýashylyǵy eńbekkerleriniń kooperatsııaǵa yqylasyn arttyrýǵa, aýyl sharýashylyq qurylymdaryn iriletý esebinen aýyl sharýashylyq salasynyń básekelestigin ulǵaıtýǵa járdemdesedi dep kútilýde. Bul sharalar azyq-túlik jaǵdaıyna jáne tıisinshe elimizdiń ekonomıkalyq qaýipsizdigine oń áser etedi.
Komıtet otyrysynda «Qazaqstan Respýblıkasynyń keıbir zańnamalyq aktilerine aýyl sharýashylyǵy kooperatıvteri máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Zań jobasymen birqatar zańnamalyq aktilerge aýyl sharýashylyǵy kooperatıvteriniń quqyqtyq mártebesin, salyq salý jáne aýdıt máselelerin retteıtin ózgerister men tolyqtyrýlar engiziledi.
Komıtet sondaı-aq «Qazaqstan Respýblıkasynyń Jer kodeksine ózgerister men tolyqtyrýlar engizý týraly» zań jobasyn da qarady.
Zań jobasy Memleket basshysy N.Nazarbaev jarııa etken 5 ınstıtýttyq reformany iske asyrý maqsatynda ázirlengen bolatyn.
Zań jobasymen Qazaqstan Respýblıkasynyń Jer kodeksine aýyl sharýashylyǵy maqsatyndaǵy jerlerdi jeke menshikke berý tetikterin damytý bolyp tabylady. Qabyldanǵan erejeler aýyl sharýashylyǵyna arnalǵan jer telimderin jeńildikti baǵamen jeke menshikke satýdy yntalandyrýdy kózdeıdi. Aýyl sharýashylyǵy óndirisine beriletin jer telimderiniń maqsatyn aýystyrý rásimderi ońtaılanady. Zań jobasyn qabyldaý agrarlyq sektordaǵy naryqtyq qatynastardy jetildirýge, aýyl sharýashylyǵyna ınvestıtsııalar tartýǵa, jer telimderin rásimdeý barysynda ashyqtyqty qamtamasyz etý jáne ákimshilik kedergilerdi joıýǵa baǵyttalǵan.
Zań jobalary Palatanyń qaraýyna jiberildi.
