Senat komıtetinde asyl tuqymdy mal sharýashylyǵy máselelerine arnalǵan joba talqylandy
ASTANA. 20 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń Tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysy bolyp ótti.
Onda senatorlar «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly» zań jobasyn talqylady. Esterińizge sala keteıik, atalǵan qujat buǵan deıin Senattyń jalpy otyrysynda birinshi oqylymda maquldanǵan bolatyn.
Zań jobasy aýyl sharýashylyǵyn nyǵaıtý jónindegi sharalar qoldaný kezeńinde el ekonomıkasynda aıyryqsha mańyzǵa ıe bolmaǵan mal sharýashylyǵy salalaryn qalpyna keltirýge baılanysty zańnamany jetildirýge baǵyttalǵan. Atap aıtqanda, ósimdik sharýashylyǵy men mal sharýashylyǵynyń negizgi salalary damyǵannan keıin elde balyq sharýashylyǵy men bal arasy sharýashylyǵyn qalpyna keltirýge baılanysty qosymsha sharalar damytyla bastady. Osy rette bolyp jatqan ózgerister qoldanystaǵy zańnamanyń jekelegen normalaryn qoldanýdyń jáne oryn alǵan olqylyqtardy joıýdyń qalyptasqan tájirıbesine sáıkes, tıisti normalarǵa túzetýler engiziledi.
Budan bólek, zań jobasynda jeke kásipkerlik sýbektilerine ákimshilik júktemeni azaıtý maqsatynda júrgizilip otyrǵan memlekettik saıasatqa sáıkes memlekettik organdardyń baqylaý jáne qadaǵalaý fýnktsııalaryn retteýler kózdeledi. Sonymen qatar, asyl tuqymdy mal sharýashylyǵy salasyndaǵy sýbektilerdi attestattaý men qaıta attestattaýdy reglamentteý qaıta qarastyrylady. Selektsııalyq asyldandyrý jumysyn júrgizý máselelerinde maqsattar men mindetterdiń arajigi ajyratylady.
Zań jobasy palatanyń jalpy otyrysyna talqylanatyn bolady.
