Senat komıtetinde arnaıy ekonomıkalyq aımaqtar týraly zań jobasy talqylandy
ASTANA. 29 qańtar. QazAqparat - Búgin QR Parlamenti Senatynyń Ekonomıkalyq damý jáne kásipkerlik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtar (AEA) máseleleri boıynsha ózgerister men tolyqtyrýlar engizý týraly» zań jobasy talqylandy.
Eske salsaq, atalǵan zań jobasy jalpy arnaıy ekonomıkalyq aımaqtardyń ınvestıtsııalyq tartymdylyǵy men ary qaraı damýyn arttyrýǵa baǵyttalǵan. Sonymen qatar arnaıy ekonomıkalyq aımaqqa ınvestıtsııa úshin qosymsha yntalandyrý tetikterin qurý men kedergilerdi tómendetý, jekemenshiktegi jer ýchaskelerin menshik ıesinen jalǵa alý esebinen AEA-nyń aýmaǵyn keńeıtý qarastyrylǵan.
Bul rette arnaıy ekonomıkalyq aımaqtar aýmaǵyn keńeıtý úshin jer telimderin jekemenshik ıesinen jalǵa alý sharttaryna sáıkes júzege asyryp, ony bekitý Úkimettiń ókilettiligine jatqyzylady.
Toqtala ketetin jaıt, Elbasynyń «Qazaqstan-2050» strategııasynda ekonomıkalyq áleýetti arttyrý maqsatynda qolaıly ınvestıtsııalyq ahýaldy qalyptastyrý qajettiligi aıtylǵan edi. Búgingi kúni qolaıly ınvestıtsııalyq ahýal qalyptastyrý quraldarynyń biri arnaıy ekonomıkalyq aımaqtardyń qyzmetin damytý jáne ony jetildirý bolyp tabylady.
Zań jobasy palatanyń jalpy otyrysyna talqylaýǵa shyǵarylady.
