Senat komıteti jergilikti ózin-ózi basqarýdy qarastyratyn qujatty talqylady
ASTANA. 4 maýsym. QazAqparat - Búgin QR Parlamenti Senaty Tabıǵatty paıdalaný jáne aýyldyq aýmaqtardy damytý komıtetinde «Qazaqstan Respýblıkasynyń keıbir zańnamalyq aktilerine jergilikti ózin-ózi basqarý máseleleri boıynsha ózgerister men tolyqtyrýlar engizý týraly» zań jobasy qaraldy.
Eske sala keteıik, zań jobasyn buǵan deıin Senat birinshi oqylymda maquldaǵan bolatyn. Qujattyń basty maqsaty jergilikti ózin-ózi basqarýdy júzege asyrýda azamattardyń konstıtýtsııalyq quqyqtaryn iske asyrýdy qamtamasyz etý úshin quqyqtyq sharttardy jasaý bolyp tabylady. Bul rette jergilikti qoǵamdastyqtyń jınalystary (jıyndary) arqyly jergilikti mańyzy bar máselelerdi sheshýde aýyldardyń, kentterdiń, aýdandyq mańyzy bar qalalardyń turǵyndarynyń rólin arttyrý kózdeledi. Sonymen qatar, aýyl turǵyndarynyń jınalystaryn, jıyndaryn qalyptastyrý, ótkizý jáne quzyretin retteý, jınalysta jergilikti mańyzy bar máselelerdi qarjylandyrýdy mindetti túrde talqylaý sharalary qarastyrylady.
Budan bólek, zań jobasynda Elbasy belgilegen tártippen máslıhat depýtattarynyń aýdandyq mańyzy bar qalalardyń, kentterdiń, aýyldardyń, aýyldyq okrýgterdiń ákimderin saılaý jónindegi normany engize otyryp, ákimderdi saılaý kezindegi máslıhattardyń rólin arttyrý qarastyrylady. Sondaı-aq jergilikti mańyzy bar máselelerdi sheshýde basqarýdy keńeıtý kózdelgen. Onyń ishinde ákimderge tabys kózderin qalyptastyrý quqyǵy beriledi. Bul rette ákimderdiń qaramaǵyndaǵy múlikti jalǵa berýden túsetin kirister, erikti alymdar, qaıyrymdylyq jáne demeýshilik jarnalary, aıyppuldyń jekelegen túrleri, syrtqy jarnamany ornalastyrý úshin tólemder, sonymen birge, zańnamaǵa qaıshy kelmeıtin ózge de túsimderdi ákimderdiń ózderine qalyptastyrý quqyǵy beriledi. Jergilikti halyqtyń qajettilikterin qanaǵattandyrý jáne qosymsha tabys alý úshin aýyldyq ákimderge aýdandyq kommýnaldyq menshiktiń bir bóligin, atap aıtqanda, mádenıet úılerin, kitaphanalardy, balabaqshalardy, sport nysandaryn berý qarastyrylady.
Tutastaı alǵanda zań jobasyn qabyldaý jınalystar men jıyndar arqyly halyqtyń erkin bildirý bóliginde azamattardyń konstıtýtsııalyq quqyǵyn iske asyrýǵa múmkindik beredi. Sonymen qatar, qujat aýdandyq (qalalyq) máslıhattar tarapynan aýdandyq mańyzy bar qalalardyń, aýyldyq okrýgterdiń, aýyldyq okrýgterdiń quramyna kirmeıtin aýyldardyń ákimderin saılaýdy qarastyrady. Halyqtyń basqarýshylyq sheshimderin qabyldaýǵa qatysý arqyly sapaly turǵyn úı kommýnaldyq qyzmetterdi alýǵa, sanıtarlyq jaǵdaıdy, qoǵamdyq tártipti jaqsartýǵa degen qyzyǵýshylyǵyn arttyrý qamtylady. Budan bólek, jergilikti halyq jergilikti mańyzy bar máselelerdi sheshýge bólingen bıýdjet qarajattaryn paıdalaný boıynsha monıtorıng júrgizýge qatysatyn bolady. Al ondaı jergilikti mańyzy bar máselelerdi sheshýdegi tómengi deńgeıdegi ákimderdiń derbestigi kezeń-kezeńimen jáne birtindep nyǵaıtylady.
Zań jobasy ekinshi oqylymda palatanyń qaraýyna joldanatyn boldy.
