Senat komıteti jańartylatyn energııa kózderin qoldaýǵa baǵyttalǵan zań jobasyn talqylady
ASTANA. 18 maýsym. QazAqparat - Búgin Qazaqstan Respýblıkasy Parlamenti Senaty Tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysy ótti. Onda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasy talqylandy.
Zań jobasy jańartylatyn energııa kózderin damytý salasyndaǵy memlekettik saıasatty iske asyrý maqsatynda ázirlengen bolatyn. Sonymen qatar, zań jobasy jańartylatyn kózderden elektr energııasyn óndirý úshin qolaıly jaǵdaı jasaýǵa baǵyttalǵan. Budan bólek, zań jobasy ınvestorlardy da, jeke tutynýshylardy da qoldaýdy kózdeıdi. Qujattyń tujyrymdamasy boıynsha jańartylatyn energııa kózderine jer telimderin berý sharasy erekshe jaǵdaılar boıynsha beriletin bolady. Bunymen qosa, zańnamada turaqty tarıfter engizý máselesi de qarastyrylyp otyr. Atap aıtqanda, zań jobasymen jańartylatyn energııa kózderinen óndiriletin elektr qýatynyń turaqty tarıfterin belgileý qamtylady. Al mundaı turaqty tarıfterdi Úkimet uzaq merzimdi kezeńge, naqtylasaq on bes jylǵa deıin belgileıtin bolady.
Jalpy, zań jobasyn qabyldaý ınvestorlarǵa salǵan qarajattyń qaıtarymdylyǵy jaǵynan kepildik beredi, sondaı-aq Qazaqstannyń jumys istep turǵan energııa júıesine yqpaldastyra otyryp, jańartylatyn energııa kózderiniń iri jobalaryn iske asyrý boıynsha tájirıbe jınaqtaýǵa kómektesedi.
