Senat komıteti zańsyz kiristerdi zańdastyrýǵa qarsy is-qımyldy qamtıtyn zań jobasyn talqylady
ASTANA. 16 mamyr. QazAqparat - Búgin Parlament Senatynyń Qarjy jáne bıýdjet komıtetiniń keńıtilgen otyrysy bolyp ótti.
Onda «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy talqylandy.
Esterińizge sala keteıik, buǵan deıin Konstıtýtsııalyq Keńes Úkimetke zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańdy quqyqtyq pozıtsııaǵa sáıkes keltirýdi qarastyratyn zań jobasyn Parlamentke engizý týraly usynys jasaǵan bolatyn.
Soǵan oraı, zań jobasymen zańsyz jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy qujattardaǵy olqylyqtardy joıý kózdeledi. Sonymen qatar, qujat boıynsha birqatar operatsııalardyń shekti somalarynyń mólsherin ulǵaıtý qarastyrylady. Atap aıtqanda klıenttiń basqa tulǵanyń paıdasyna aqysyz negizde júzege asyratyn tólemderi men aqsha aýdarymdary 2 mln. teńgeden 6 mln, teńgege, mádenı qundylyqtardy satyp alý-satý, elimizge ákelý nemese áketý 7 mln. teńgeden 30 mln. teńgege deıin, qarjylyq lızıng kelisimi boıynsha múlik alý nemese berý 7 mln. teńgeden 30 mln. teńgege deıin, mindetti memlekettik tirkeýge jatatyn jyljymaıtyn jáne basqa múlikpen mámileler 45 mln. teńgeden 150 mln. teńgege deıin ulǵaıady. Sondaı-aq, qujat boıynsha qarjylyq monıtorıngke jatatyn tizimdi qysqartý da kózdeledi.
Zań jobasy palatanyń jalpy otyrysyna shyǵarylatyn bolady.
