Senat komıteti terrorızmge qarsy is-qımylǵa baǵyttalǵan zań jobasyn talqylady

Jıyn barysynda senatorlar «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylady, dep habarlaıdy QazAqparat.

 Atalǵan zań jobasy 2007-2011 jyldarǵa arnalǵan Ulttyq qaýipsizdik strategııasy erejelerin oryndaý maqsatynda ázirlengen. «2001 jylǵy qyrkúıektiń  11-degi oqıǵadan keıin halyqaralyq terrorızm ǵalamdyq qaýip-qaterge aınaldy. Osy qaýipke qatysty ulttyq baǵa berý jáne kúresý tásilderi túbegeıli ózgeristerge ushyrap otyr. Qazaqstan da mundaı úrdisten shettep qalmaıdy. Osyǵan oraı, qaralyp otyrǵan zań jobasy elimizdiń qoldanystaǵy zańnamalaryn halyqaralyq tájirıbege sáıkes keltirý, terrorızmge qarsy is-qımyldyń anyq qaǵıdalaryn qalyptastyrýǵa baǵyttalyp otyr», dedi zań jobasy boıynsha baıandama jasaǵan Ulttyq qaýipsizdik komıteti tóraǵasynyń mindetin atqarýshy Ádil Shaıahmetov.

 Onyń aıtýynsha, qujat terrorızmge qarsy is-qımyl salasyndaǵy respýblıkalyq, halyqaralyq mindettemelerdi iske asyrýǵa, ulttyq zańnamany úılestirýge jáne birizge keltirýge baǵyttalady. Budan basqa, osyndaı qaýipke qarsy turýdyń quqyqtyq negizderin jetildirip, lańkestikpen kúresýdiń tıimdi memlekettik júıesin ońtaılandyrý sharalary kózdeledi. «Zań jobasy terrorızmniń aldyn alýǵa jáne kúresýge, sondaı-aq onyń saldaryn joıý men barynsha azaıtýǵa baǵyttalǵan keshendi quqyqtyq jáne uıymdastyrýshylyq sharalardy qamtyp otyr. Sonymen birge, zań jobasyndaǵy ózgeristerge sáıkes terrorızmge qarsy operatsııalardyń quqyqtyq tártibi belgilenedi. Qujat boıynsha Prezıdenttiń jáne Úkimettiń ókilettiligi, terrorızmge qarsy is-qımyldy úılestirý jónindegi ýákiletti organnyń qyzmeti men mindeti anyqtalady», dedi Á. Shaıahmetov.

 Komıtet músheleri zań jobasyn palatanyń jalpy otyrysyna talqylaýǵa shyǵarý týraly sheshim qabyldady.