Senat komıteti salyq salý máselelerine arnalǵan zań jobasyn talqylady
ASTANA. 4 jeltoqsan. QazAqparat - Búgin Qazaqstan Respýblıkasy Parlamenti Senatynyń Qarjy jáne bıýdjet komıtetinde «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy talqylandy.
Atalǵan qujattyń maqsaty salyq zańnamasynyń jekelegen normalaryn naqtylaý jáne jetildirý, ákimshilendirýdiń keıbir tetikterin qaıta qaraý jáne elimizdiń salyq júıesin Keden odaǵynyń keden zańnamasy erejelerine sáıkestendirý bolyp tabylady. Bul rette Elbasynyń tapsyrmasyna sáıkes, kompanııalar jumysynyń ónimdiligi men tıimdiligin arttyrýǵa, aqparatty óńdeý shyǵyndary men oǵan jumsalatyn ýaqytty azaıtýǵa múmkindik beretin, salyqtyq ákimshilendirýdi jaqsartýǵa yqpal etetin elektrondyq shot-faktýralar engizý kózdeledi. Budan bólek, zańdy tulǵalar men dara kásipkerlerdiń jekelegen sanattaryna taratýdyń salyqtyq tekserisin júrgizbeı, kameralyq baqylaý nátıjeleri negizinde taratýdyń ońaılatylǵan tártibi belgilenedi. Sondaı-aq, salyq eseptiligin tabys etpeıtin áreketsiz salyq tóleýshilerdi májbúrlep taratýdyń arnaýly tetikteri engiziledi. Al adal salyq tóleýshiler úshin salyqtyq tekserý nátıjeleri týraly habarlamada kórsetilgen, esepke jazylǵan salyqtardy, bıýdjetke tólenetin basqa da mindetti tólemderdi tóleý merzimin kepilsiz jáne bank kepildiginsiz kúntizbelik 36 aıǵa deıingi merzimge ózgertýge múmkindik kózdelgen. Sonymen qatar, birqatar ákimshilik quqyq buzýshylyqtar boıynsha ondaı quqyq buzýshylyqty alǵash jasaǵandarǵa «eskertý» sekildi jazalaý sharasyn engizý qarastyrylyp otyr.
Zań jobasyn Senatta qaraý barysynda tıisti ózgerister men tolyqtyrýlar engiziletin boldy. Sóıtip, «Salyq jáne bıýdjetke tólenetin mindetti tólemder týraly» kodekske, «Qazaqstan Respýblıkasyndaǵy bank jáne bank qyzmeti týraly», «Saqtandyrý qyzmeti týraly» zańdarǵa jáne elimizdiń zańnamasyna bank qyzmetin retteý jáne qarjy uıymdaryndaǵy táýekelderdi azaıtý týraly ózgerister men tolyqtyrýlar usynyldy. Qujat palatanyń qaraýyna jiberiledi.
