Senat komıteti salyq isterine arnalǵan konventsııany talqylady

ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysy ótti. Onda «Salyq isteri boıynsha ózara ákimshilik kómek týraly konventsııany ratıfıkatsııalaý týraly» zań jobasy talqylandy.

Atalǵan Konventsııa Eýropa Keńesine múshe memleketter men Ekonomıkalyq yntymaqtastyq jáne damý uıymyna múshe eldermen Strasbýrg qalasynda 1988 jyly qol qoıylǵan. Konventsııaǵa qosylý ony qabyldaǵan memleketterdiń quzyretti organdary arasynda bir mezgilde salyqtyq tekserýler júrgizýge, salyq bereshegin óndirip alý boıynsha sharalar qoldanýǵa quqyqtyq negiz qalyptastyrady. Konventsııaǵa sáıkes, Eýropa Keńesine múshe memleketter men Ekonomıkalyq yntymaqtastyq jáne damý uıymyna múshe elder salyq isteri boıynsha birbirine ákimshilik kómekter kórsetetin bolady.

Toqtala ketetin jaıt, qazirgi kúni Qazaqstan qosarlanǵan salyqty boldyrmaý týraly 46 konventsııa men aqparat almasý týraly kelisimniń negizinde shet memlekettermen aqparat almasady. Máselen, byltyr Qazaqstan salyq máseleleri boıynsha shet elderge 175 saýal jiberdi, al shet memleketterdiń salyq qyzmetinen 182 suraýlar túsken. Degenmen, elimizde qabyldaǵan konventsııalar men kelisimderdiń múmkindikteri shekteýli bolyp otyr, olar tek korporatıvtik jáne jeke tabys salyǵyna ǵana qoldanylady. Al qaralyp otyrǵan Konventsııa salyq aqparatynyń almasý tájirıbesiniń tıimdiligin arttyrýdy qamtıdy.

Tutastaı alǵanda, konventsııa salyqtyń barlyq túrleri boıynsha aqparat almasýǵa múmkindik beredi. Qajetti aqparatty alý ádisteri edáýir jeńildeı túsedi.

Zań jobasy aldaǵy ýaqytta palatanyń jalpy otyrysyna shyǵarylady.