Senat komıteti ruqsat berý júıesindegi problemalardy sheshýge baǵyttalǵan jobany talqylady
ASTANA. QazAqparat - Búgin QR Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetinde «Ruqsattar jáne habarlamalar týraly» zań jobasy talqylandy.
Memleket basshysynyń tapsyrmalaryna sáıkes zań jobasy Qazaqstannyń ruqsat berý júıesiniń birqatar júıeli problemalaryn sheshýge baǵyttalǵan. Atap aıtqanda, zań jobasynda ruqsattar men habarlamalardyń tolyq tizbesi belgilenedi. Jańa ruqsattar men habarlamalardy engizgenge deıin jáne engizgennen keıin retteýshilik áserdi taldaý qarastyrylady. Budan bólek, qujatta retteý obektisiniń qaýiptilik dárejesi boıynsha ruqsattar men habarlamalardy sanattaý kózdelip otyr. Ol boıynsha birinshi sanattaǵy ruqsattar - lıtsenzııalar, ekinshi sanattaǵy ruqsattar - barlyq qalǵan ruqsattar, habarlamalar bolyp jiktelmek.
Budan bólek, zań jobasymen kásipkerlik qyzmet sýbektilerimen basqa da tulǵalardyń qyzmettiń nemese áreketterdiń jekelegen túrlerin júzege asyrýdyń ruqsat berý nemese habarlama jasaý tártipteriniń belgilenýine baılanysty qoǵamdyq qatynastardy retteý salasyndaǵy quqyqtyq negizder belgilenedi.
Sonymen qatar zań jobasynda habarlama jasaý tártibin engizýdiń jáne onyń kúshin joıýdyń sharttary men tártibi tolyq reglamenttelgen. Bul rette «Ákimshilik rásimder týraly» zańnan habarlamalar týraly uqsas normalar alyp tastalǵan.
Sonymen qatar, ruqsattar jáne habarlamalar engizý men olardyń kúshin joıý tártibin reglamentteý osy zań jobasynyń prıntsıpti jańalyǵy bolyp tabylady.
Sondaı-aq komıtette «Qazaqstan Respýblıkasynyń keıbir zańnamalyq aktilerine ruqsat berý júıesi máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy. Zań jobasymen 79 zańnamalyq aktige ózgerister men tolyqtyrýlar engizý kózdelip otyr. Onda ruqsat berý qujattarynyń sanyn qysqartý, ruqsat berý qujattaryn berý rásimine usynylatyn talaptardy naqty reglamentteý sharalary kózdelgen. Sondaı-aq, qujat bıznesti júrgizýge kedergilerdi joıý, ruqsat berý jáne habarlama jasaý rásimderin júzege asyrýdy avtomattandyrýdy qamtamasyz etýge múmkindik beretin normalardy engizý arqyly ruqsat etý júıesin reformalaýǵa baǵyttalǵan.
