Senat komıteti Memlekettik shekara týraly zań jobasyn talqylady
ASTANA. 19 jeltoqsan. QazAqparat - Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń Memlekettik shekarasy týraly» jańa zań jobasy talqylandy.
Toqtala ketetin jáıt, búgingi tańda Qazaqstannyń Memlekettik shekarasyn qorǵaý salasyndaǵy qatynastar 1993 jyly qabyldanǵan zańmen rettelip keledi. Alaıda, ótken 20 jyl ishinde elimizdiń syrtqy saıası-ekonomıkalyq jaǵdaıy ózgerdi, ulttyq qaýipsizdikke jańa qaterler tónip, burynǵylary ýshyǵa tústi, kóshi-qon úderisi beleń ala bastady. Sondaı-aq, Qazaqstan aýmaǵy arqyly Eýropa-Qytaı, Reseı-Ortalyq Azııa baǵyttaryndaǵy tasymaldar da arta tústi, «Qorǵas» halyqaralyq shekaralyq yntymaqtastyq ortalyǵy da jumys isteı bastady. Osyǵan baılanysty 20 jyl buryn qabyldanǵan zań búgingi kúnniń talabyna saı kelmeıdi. Onyń keıbir erejelerinde naqty baǵyttar qamtylmaǵan. Osy máseleni eskere kele, UQK shekara qyzmeti jańa zań jobasyn ázirlegen. Zań jobasynda Qazaqstannyń shekaralyq keńistigindegi qoldanylatyn birqatar rejimderdiń maǵynasy men mazmuny ashylady. Budan bólek, qujatta Memlekettik shekarany sanattarǵa bólý rásimi engiziledi. Memlekettik organdardyń, onyń ishinde jergilikti atqarý organdarynyń quzireti jan-jaqty aıqyndalyp, arajigi ajyratylady.
Sonymen qatar, zań jobasynda Qazaqstan azamattarynyń Memlekettik shekarany qorǵaýǵa qatysý tártibi naqtylanyp, olardyń quqyqtary men mindetteri retteledi. Memlekettik shekarany qorǵaý jónindegi mindetterdi oryndaý kezinde qarý-jaraqty jáne áskerı tehnıkany, arnaýly quraldardy, qyzmettik janýarlardy jáne dene kúshin qoldanýdyń sharttary men shekteri belgilenedi.
Zań jobasy palatanyń jalpy otyrysyna talqyǵa shyǵarylatyn bolyp kelisildi.
