Senat komıteti magıstraldyq qubyr týraly zań jobasyn talqylady
ASTANA. 12 maýsym. QazAqparat -Búgin Senattyń Ekonomıkalyq damý jáne kásipkerlik komıtetiniń keńeıtilgen otyrysy bolyp ótti. Onda depýtattar Májilis maquldaǵan «Magıstraldyq qubyr týraly» zań jobasyn talqylady.
Atalǵan zań jobasy elimizdiń ekonomıkasy úshin strategııalyq mańyzy bar magıstraldyq qubyr salasyndaǵy qatynastardy retteý jolymen Qazaqstan Respýblıkasynyń ekonomıkalyq jáne energetıkalyq qaýipsizdigin nyǵaıtý maqsatynda ázirlengen. Toqtala ketetin jaıt, buǵan deıin magıstraldyq qubyr salasyndaǵy quqyqtyq qatynastardyń mańyzdy bóligi ulttyq zańnamamen rettelmegen bolatyn. Osynyń ózi magıstraldyq qubyrlardy damytý úshin tejeýshi faktor bolyp tabylady. Osyǵan oraı ázirlengen zań jobasynyń basty jańalyǵy - magıstraldyq qubyrlardy qaıta qurý arqyly olarǵa memlekettiń basym quqyqtaryn bekitý. Sonymen qatar, magıstraldyq qubyr salasyndaǵy qyzmet kórsetetin nemese onyń qyzmetin paıdalanatyn tulǵalardyń mindeti men quqyqtaryn anyqtaý qarastyrylady. Budan bólek osy salada ulttyq operator ınstıtýtyn engizý máselesi de kózdeledi.
Toqtala ketetin jaıt, elimizde óndiriletin kómirsýtekti shıkizattardyń aıtarlyqtaı úlesi magıstraldyq qubyrlar arqyly ishki jáne syrtqy naryqqa shyǵady. Sondyqtan da, bul másele strategııalyq mańyzǵa ıe bolyp otyr. Sondaı-aq, magıstraldyq qubyrlar arqyly munaı tasymaldaý el bıýdjetiniń túsimin aıtarlyqtaı arttyratyny belgili.
Zań jobasy qabyldansa, elimizde qaıta salynatyn jáne qoldanystaǵy kez kelgen (meıli memlekettik, meıli jekemenshik bolsa da) magıstraldyq qubyrlarǵa memlekettiń qatysýyn qamtıtyn basym quqyǵy bekitiletin bolady. Al jańa qubyrlar salý barysynda birinshi kezekte qubyrlardy salýda memlekettiń ekonomıkalyq múddesi qorǵalatyn bolady.
Zań jobasy aldaǵy ýaqytta ótetin palatanyń jalpy otyrysyna shyǵarylady.
